aurten hamein dhakelti hain

ham gandum par iktifā kar lete

lekin hamāre sāmne kachchī roTī kī mahak rakhī ga.ī

aur phir roze toḌne paḌe

ham ek gunāh par raazī the

lekin un meñ māmtā kuuT kuuT kar bharī huī thī

so hameñ saare savāb khone paḌe

ham apnī zamīnoñ par mutma.in hone ko the

ki jangal meñ lakaḌhāre se mulāqāt ho ga.ī

aur achānak barsāt

hameñ chaar ke ma.anī ma.alūm bhī na ho paate

agar ham kabhī ek se sair na hue hote

aur is amal ko zarb-e-musalsal se na guzārā jaatā

hameñ har kueñ meñ ḳhud-kushī kā shauq bhī na hotā

agar vo hamārī raat se zyāda gahre na ho sakte

aur paanī mazīd sastā

ham un ke pairoñ talak rahte

agar dil kā rāsta naaf se ho kar na jaatā

aur dimāġh vo takiyoñ pe na dhar ātīñ

hameñ surḳh rang kī aadat Daalī ga.ī

jis se un par lagne vaale saare dhabbe hamāre kahlā.e

aur sharāb ke ma.anī badalte rahe

hameñ aag se khelte hue

ek raat bhī na mukammal huī ki elaan huā

apnī marzī se khelne par hāviya hamesha ke liye tumhārī huī

hum gandum par iktifa kar lete

lekin hamare samne kachchi roTi ki mahak rakhi gai

aur phir roze toDne paDe

hum ek gunah par raazi the

lekin un mein mamta kuT kuT kar bhari hui thi

so hamein sare sawab khone paDe

hum apni zaminon par mutmain hone ko the

ki jangal mein lakaDhaare se mulaqat ho gai

aur achanak barsat

hamein chaar ke mani malum bhi na ho pate

agar hum kabhi ek se sair na hue hote

aur is amal ko zarb-e-musalsal se na guzara jata

hamein har kuen mein KHud-kushi ka shauq bhi na hota

agar wo hamari raat se zyaada gahre na ho sakte

aur pani mazid sasta

hum un ke pairon talak rahte

agar dil ka rasta naf se ho kar na jata

aur dimagh wo takiyon pe na dhar aatin

hamein surKH rang ki aadat Dali gai

jis se un par lagne wale sare dhabbe hamare kahlae

aur sharab ke mani badalte rahe

hamein aag se khelte hue

ek raat bhi na mukammal hui ki elan hua

apni marzi se khelne par hawiya hamesha ke liye tumhaari hui