babul

mire lahū meñ diye jis ke ḳhuuñ ke jalte haiñ

nuqūsh jis ke mire ḳhāl-o-ḳhad meñ Dhalte haiñ

mahak se jis kī gul-o-lāla mujh meñ khilte haiñ

mirī hañsī meñ sabhī rañg us ke milte haiñ

vo jis ne maan diye sab sharāratoñ ke mujhe

javāb jis ne diye sab bujhāratoñ ke mujhe

qarīne jis ne sikhā.e jasāratoñ ke mujhe

diye muāfī lahū kī harārtoñ ke mujhe

vo jis ke sajdoñ kī tāsīr zindagī merī

hai ujlī jis kī duāoñ se har ḳhushī merī

usī kā nuur hai āñkhoñ kī raushnī merī

usī ke dam se hī qaa.em hai ye chāñdnī merī

vo jis kī thaam ke uñglī ko chalnā sīkhā thā

qalam se us ke hī maiñ ne ye likhnā sīkhā thā

vo jis ne paḌhnā mujhe harf harf batlāyā

vo jis ne chaḌhnā mujhe ziina ziina sikhlāyā

vo jis kī baat kā darja thā ik qasam kī tarah

vo jis jabīñ pe lagīñ bal mujhe karam kī tarah

vo jis ke ghar kī hai chaukhaT mujhe haram kī tarah

judā.ī jis kī hai paiham mujhe alam kī tarah

usī ke rañg meñ jazbe haiñ sab nahā.e hue

ki shafqatoñ kā alam jaañ mirī uThā.e hue

ye merā ilm-o-hunar sar ko hai jhukā.e hue

haiñ jis ke dam se sabhī harf jagmagā.e hue

mire kalām meñ bābul vo isti.āra hai

mujhe 'sadaf' jo mirī zindagī se pyārā hai

mere lahu mein diye jis ke KHun ke jalte hain

nuqush jis ke mere KHal-o-KHad mein Dhalte hain

mahak se jis ki gul-o-lala mujh mein khilte hain

meri hansi mein sabhi rang us ke milte hain

wo jis ne man diye sab shararaton ke mujhe

jawab jis ne diye sab bujhaaraton ke mujhe

qarine jis ne sikhae jasaraton ke mujhe

diye muafi lahu ki hararton ke mujhe

wo jis ke sajdon ki tasir zindagi meri

hai ujli jis ki duaon se har KHushi meri

usi ka nur hai aankhon ki raushni meri

usi ke dam se hi qaem hai ye chandni meri

wo jis ki tham ke ungli ko chalna sikha tha

qalam se us ke hi main ne ye likhna sikha tha

wo jis ne paDhna mujhe harf harf batlaya

wo jis ne chaDhna mujhe zina zina sikhlaya

wo jis ki baat ka darja tha ek qasam ki tarah

wo jis jabin pe lagin bal mujhe karam ki tarah

wo jis ke ghar ki hai chaukhaT mujhe haram ki tarah

judai jis ki hai paiham mujhe alam ki tarah

usi ke rang mein jazbe hain sab nahae hue

ki shafqaton ka alam jaan meri uThae hue

ye mera ilm-o-hunar sar ko hai jhukae hue

hain jis ke dam se sabhi harf jagmagae hue

mere kalam mein babul wo istiara hai

mujhe 'sadaf' jo meri zindagi se pyara hai