baadban

samundaroñ kī nīl-gūñ fazā-e-āb meñ bhī raqs kar chukā huuñ bār-hā

mire liye koī ufuq ye āsmāñ kī vus.ateñ bhī ajnabī nahīñ

maiñ in meñ saikḌoñ, hazāroñ zindagī ke giit ātishīñ dhunoñ meñ gā chukā

kisī ko DhūñD hī rahā thaa, kaun jaane kis ko DhūñDhtā thā maiñ

hazār baar DhūñDhtā rahā huuñ jis ko mausamoñ ke madd-o-jazr meñ magar na pā sakā

sitāre Dūbne lage aur āñdhiyoñ kī shiddateñ habāb ban ke rah ga.iiñ

kisī ko DhūñD hī rahā thā maiñ sahar kī narm narm shabnamīñ fazāoñ meñ

ki aap aa ga.īñ, aur aa ke chhā ga.iiñ samundar aur āsmāñ kī be-karāñ ḳhalāoñ meñ

hazāroñ dāstāneñ bahr-e-nīlgūñ kī chashm-e-nāz meñ liye hue

hazāroñ mahr-o-māh kī tajalliyoñ kā jism ā.īna banā huā

maiñ soch hī rahā thaa, lahreñ nabz-e-kā.enāt to nahīñ

ki ek lahr uTThī jis kī barhamī ke sāmne mirī tamām quvvateñ habāb ban ke rah ga.iiñ

kanār-e-āb ek pal maiñ dekhte hī dekhte maiñ phir paḌā huā thā ret par

mire badan kī ret kā har ek zarra ek ā.īna thā

aur jaane kitne āftāb jagmagā rahe the mere jism par

hazār maiñ gunāhgār huuñ to kyā

ye merā jism ḳhāk-o-ḳhūñ kā imtizāj hī sahī

hazār maiñ gunāh-gār huuñ to kyā

ye zalzale ye āñdhiyāñ ye barq o ātish o sharar mire mizāj hī sahī

magar sukūn pā ke jab bhī shādmāñ huā huuñ

gungunā uThā huuñ muskurā diyā huuñ

mire is āhanī mahal ke āstāñ pe āsmāñ kī jannateñ bhī sajda-rez ho ga.iiñ

agar nahīñ haiñ nāriyal ke saa.e sat.h-e-āb par to kyā huā

magar bahut hī duur aa chuke haiñ sāhiloñ ko chhoḌ kar

uThāo lañgar aur bādbān khol do

havā.eñ tez haiñ to kyā ye lahreñ sho.ala-rez haiñ to kyā

uThāo lañgar aur bādbān khol do

maiñ jāntā huuñ ḳhuub jāntā huuñ ek kā.enāt aur bhī hai

māvarā-e-kā.enāt

baras rahā hai amrit āsmāñ se chāñdnī ke ruup meñ

zamīñ zamīñ kī kā.enāt ke liye numū hai dhuup meñ

magar ye barg ye samar ye gulsitāñ baġhair rañg ke to kuchh nahīñ

sitāre Dūbne lage to kyā

ye lahreñ sho.ala-rez haiñ to kyā

uTho aur uTh ke kashtiyoñ ke bādbān khol do

ye kaun kahtā hai ki lahroñ kā ḳhudā koī nahīñ

ye lahreñ ḳhuub jāntī haiñ sāhiloñ kā rāsta

samundaron ki nil-gun faza-e-ab mein bhi raqs kar chuka hun bar-ha

mere liye koi ufuq ye aasman ki wusaten bhi ajnabi nahin

main in mein saikDon, hazaron zindagi ke git aatishin dhunon mein ga chuka

kisi ko DhunD hi raha tha, kaun jaane kis ko DhunDhta tha main

hazar bar DhunDhta raha hun jis ko mausamon ke madd-o-jazr mein magar na pa saka

sitare Dubne lage aur aandhiyon ki shiddaten habab ban ke rah gain

kisi ko DhunD hi raha tha main sahar ki narm narm shabnamin fazaon mein

ki aap aa gain, aur aa ke chha gain samundar aur aasman ki be-karan KHalaon mein

hazaron dastanen bahr-e-nilgun ki chashm-e-naz mein liye hue

hazaron mahr-o-mah ki tajalliyon ka jism aaina bana hua

main soch hi raha tha, lahren nabz-e-kaenat to nahin

ki ek lahr uTThi jis ki barhami ke samne meri tamam quwwaten habab ban ke rah gain

kanar-e-ab ek pal main dekhte hi dekhte main phir paDa hua tha ret par

mere badan ki ret ka har ek zarra ek aaina tha

aur jaane kitne aaftab jagmaga rahe the mere jism par

hazar main gunahgar hun to kya

ye mera jism KHak-o-KHun ka imtizaj hi sahi

hazar main gunah-gar hun to kya

ye zalzale ye aandhiyan ye barq o aatish o sharar mere mizaj hi sahi

magar sukun pa ke jab bhi shadman hua hun

gunguna uTha hun muskura diya hun

mere is aahani mahal ke aastan pe aasman ki jannaten bhi sajda-rez ho gain

agar nahin hain nariyal ke sae sath-e-ab par to kya hua

magar bahut hi dur aa chuke hain sahilon ko chhoD kar

uThao langar aur baadban khol do

hawaen tez hain to kya ye lahren shoala-rez hain to kya

uThao langar aur baadban khol do

main jaanta hun KHub jaanta hun ek kaenat aur bhi hai

mawara-e-kaenat

baras raha hai amrit aasman se chandni ke rup mein

zamin zamin ki kaenat ke liye numu hai dhup mein

magar ye barg ye samar ye gulsitan baghair rang ke to kuchh nahin

sitare Dubne lage to kya

ye lahren shoala-rez hain to kya

uTho aur uTh ke kashtiyon ke baadban khol do

ye kaun kahta hai ki lahron ka KHuda koi nahin

ye lahren KHub jaanti hain sahilon ka rasta