baadshah nanga hai

bādshāh hāthī ke paañv ke nīche

achānak nahīñ aaya thā

magar darbāriyoñ ne faisla kiyā

ki kal jo shaḳhs sab se pahle

shahr meñ dāḳhil hogā

bādshāhat use sauñp dī jā.egī

agle din hāthī ne

chupke se ek baune ko

shahr ke sadr darvāze par

apnī piiTh se utārā

aur ba-zāhir ġhā.eb ho gayā

baunā shahr meñ dāḳhil huā

to ahl-e-darbār ne use hāthoñ haath liyā

aur apne faisle se āgāh kiyā

baune ne hairat se sar uThā kar unheñ dekhā

to us kī Topī zamīn par gir ga.ī

ye dekh kar musāhibīn be-sāḳhta hañs diye

baunā khisyāna ho gayā

magar ahālī mavālī fauran hī ādāb bajā laa.e

aur taḳht par baiThne kī darḳhvāst kī

baune ne kahā

vo sirf is shart par hukmrāñ banegā

ki sab log us ke ham-qadr ho jaa.eñ

maslahat kī daldal meñ phañse

mafādāt kī Dor meñ bañdhe

un 'āqibat-nā-andesh ne

baune kī ye baat maan lī

is martaba baune ne faḳhr se

sar uThā kar dekhā

to na us kī Topī nīche girī

aur na hī ahl-e-darbār hañse

baadshah hathi ke panw ke niche

achanak nahin aaya tha

magar darbariyon ne faisla kiya

ki kal jo shaKHs sab se pahle

shahr mein daKHil hoga

baadshahat use saunp di jaegi

agle din hathi ne

chupke se ek baune ko

shahr ke sadr darwaze par

apni piTh se utara

aur ba-zahir ghaeb ho gaya

bauna shahr mein daKHil hua

to ahl-e-darbar ne use hathon hath liya

aur apne faisle se aagah kiya

baune ne hairat se sar uTha kar unhen dekha

to us ki Topi zamin par gir gai

ye dekh kar musahibin be-saKHta hans diye

bauna khisyana ho gaya

magar ahaali mawali fauran hi aadab baja lae

aur taKHt par baiThne ki darKHwast ki

baune ne kaha

wo sirf is shart par hukmran banega

ki sab log us ke ham-qadr ho jaen

maslahat ki daldal mein phanse

mafadat ki Dor mein bandhe

un 'aqibat-na-andesh ne

baune ki ye baat man li

is martaba baune ne faKHr se

sar uTha kar dekha

to na us ki Topi niche giri

aur na hi ahl-e-darbar hanse