bachche ki fariyaad

ai ḳhudā kaash maiñ ḳhudā hotā

aur tū phir mirī jagah hotā

tujh ko kartā maiñ aise ghar paidā

jis kā ghar ho na jis ke bhaa.ī bahan

paidā karte hī tujh ko maiñ tere

raat kī tarah kaale chehre par

gahre chechak ke daaġh phailātā

aur āñkheñ bhī chhīn letā maiñ

log kahte ki koDiyā hai tū

tere hone se chhe baras pahle

baap bhī terā ḳhud-kushī kartā

usī fōt-pāth par usī ghar meñ

aur maañ terī peT kī ḳhātir

bech kar jism apnā galiyoñ meñ

tere aur apne peT ko bhartī

log kahte ki tū hai nā-jā.ez

kyā terā dil nahīñ taḌaptā phir

aur maañ terī ta.ane sun sun kar

tujh ko din-rāt kostī rahtī

paidā hone se kaash pahle hī

mere bachche tū mar gayā hotā

ai ḳhudā kaash maiñ ḳhudā hotā

ai KHuda kash main KHuda hota

aur tu phir meri jagah hota

tujh ko karta main aise ghar paida

jis ka ghar ho na jis ke bhai bahan

paida karte hi tujh ko main tere

raat ki tarah kale chehre par

gahre chechak ke dagh phailata

aur aankhen bhi chhin leta main

log kahte ki koDiya hai tu

tere hone se chhe baras pahle

bap bhi tera KHud-kushi karta

usi foot-path par usi ghar mein

aur man teri peT ki KHatir

bech kar jism apna galiyon mein

tere aur apne peT ko bharti

log kahte ki tu hai na-jaez

kya tera dil nahin taDapta phir

aur man teri tane sun sun kar

tujh ko din-raat kosti rahti

paida hone se kash pahle hi

mere bachche tu mar gaya hota

ai KHuda kash main KHuda hota