baDa aadmi

jis ko duniyā meñ sab log achchhā kaheñ

jis ko īmān-dār aur sachchā kaheñ

jis ko nafrat ho har ik bure kaam se

jis ko raġhbat ho ta.alīm ke naam se

jo sahārā ho kamzor-o-majbūr kā

jis ke siine meñ ho dard mazdūr kā

jo paḌosī kā hamdard-o-ġham-ḳhvār ho

zulm ke haq meñ jo tez talvār ho

jo musībat sahe dūsre ke liye

aur haq baat be-ḳhauf ho kar kahe

jo burā.ī ke badle bhalā.ī kare

bhūle bhaTkoñ kī jo rahnumā.ī kare

jis pe apne parā.e bharosā kareñ

jis ke aḳhlāq kā log charchā kareñ

jo kisī se agar koī va.ada kare

vaqt par apne va.ade ko puurā kare

gulshan-e-amn se jis kī hai dostī

dar-haqīqat vahī hai baḌā aadmī

jis ko duniya mein sab log achchha kahen

jis ko iman-dar aur sachcha kahen

jis ko nafrat ho har ek bure kaam se

jis ko raghbat ho talim ke nam se

jo sahaara ho kamzor-o-majbur ka

jis ke sine mein ho dard mazdur ka

jo paDosi ka hamdard-o-gham-KHwar ho

zulm ke haq mein jo tez talwar ho

jo musibat sahe dusre ke liye

aur haq baat be-KHauf ho kar kahe

jo burai ke badle bhalai kare

bhule bhaTkon ki jo rahnumai kare

jis pe apne parae bharosa karen

jis ke aKHlaq ka log charcha karen

jo kisi se agar koi wada kare

waqt par apne wade ko pura kare

gulshan-e-amn se jis ki hai dosti

dar-haqiqat wahi hai baDa aadmi