badan

makāñ lā-makāñ kī 'ajab dāstāñ hai

zamīn-o-zamāñ se pare bhī jahāñ hai

jahānoñ se aage jahāñ mil rahe haiñ

jahāñ zindagī ke nishāñ mil rahe haiñ

jahāñ hūr-o-ġhilmāñ haiñ bāġh-e-adan hai

vahāñ ik badan māvarā-e-badan hai

badan āsmāñ hai badan hī zamīñ hai

badan jo nahīñ hai to kuchh bhī nahīñ hai

badan zindagī hai badan sarḳhushī hai

badan rāstī hai badan bandagī hai

badan chāñd sūraj badan kahkashāñ hai

badan ye jahāñ hai badan vo jahāñ hai

badan hai samundar badan be-karāñ hai

badan bijliyoñ kī chamak meñ nihāñ hai

badan rang-o-bū hai chaman-dar-chaman hai

elora ajantā ke fan meñ badan hai

badan mausamoñ kā nayā bāñkpan hai

badan mai-kada hai badan hī nasha hai

badan kī mahak se mo'attar fazā hai

badan ibtidā hai badan intihā hai

badan irtiqā hai badan meñ ḳhudā hai

badan jo nahīñ hai ḳhalā hī nahīñ hai

sadā be-sadā hai fanā hī fanā hai

makan la-makan ki 'ajab dastan hai

zamin-o-zaman se pare bhi jahan hai

jahanon se aage jahan mil rahe hain

jahan zindagi ke nishan mil rahe hain

jahan hur-o-ghilman hain bagh-e-adan hai

wahan ek badan mawara-e-badan hai

badan aasman hai badan hi zamin hai

badan jo nahin hai to kuchh bhi nahin hai

badan zindagi hai badan sarKHushi hai

badan rasti hai badan bandagi hai

badan chand suraj badan kahkashan hai

badan ye jahan hai badan wo jahan hai

badan hai samundar badan be-karan hai

badan bijliyon ki chamak mein nihan hai

badan rang-o-bu hai chaman-dar-chaman hai

elora ajanta ke fan mein badan hai

badan mausamon ka naya bankpan hai

badan mai-kada hai badan hi nasha hai

badan ki mahak se mo'attar faza hai

badan ibtida hai badan intiha hai

badan irtiqa hai badan mein KHuda hai

badan jo nahin hai KHala hi nahin hai

sada be-sada hai fana hi fana hai