bahut masruf rahta hun

kisī uljhī huī gutthī

ko suljhāne meñ

bahut masrūf rahtā huuñ

magar kartā huuñ bas kār-e-ziyāñ hī maiñ

maiñ kaise dostoñ ko shādmāñ rakkhūñ

aur un ke hukm kī ta.amīl meñ har lamha

kaise munhamik rakkhūñ maiñ apne aap ko

fulāñ tārīḳh ko taqrīb hai

kis ke yahāñ yaum-e-vilādat kī

fulāñ kī qabr par jaanā hai paḌhne

fātiha kis din

mire hamrāh rahtī hai koī uljhī huī gutthī

hamesha sochtā rahtā huuñ is tarah

maiñ ḳhud se munharif ho kar

ki ḳhud apnā bhī maiñ yaum-e-vilādat bhuul jaatā huuñ

saḳhāvat kī tag-o-dau meñ

ye aksar bhuul jaatā huuñ

ki jaanā hai ḳhud apnī qabr par bhī fātiha paḌhne

kisi uljhi hui gutthi

ko suljhane mein

bahut masruf rahta hun

magar karta hun bas kar-e-ziyan hi main

main kaise doston ko shadman rakkhun

aur un ke hukm ki tamil mein har lamha

kaise munhamik rakkhun main apne aap ko

fulan tariKH ko taqrib hai

kis ke yahan yaum-e-wiladat ki

fulan ki qabr par jaana hai paDhne

fatiha kis din

mere hamrah rahti hai koi uljhi hui gutthi

hamesha sochta rahta hun is tarah

main KHud se munharif ho kar

ki KHud apna bhi main yaum-e-wiladat bhul jata hun

saKHawat ki tag-o-dau mein

ye aksar bhul jata hun

ki jaana hai KHud apni qabr par bhi fatiha paDhne