bakra

ek sachchā vāqi.a hai jaam.ī

aap samjheñ to hai ik tamsīl bhī

haiñ hamāre gaañv meñ ik maulvī

jo bichāre haiñ bahut nādār bhī

ek bakrā un kī pūñjī hai vahī

diid ke qābil hai jis kī farbahī

ek ġhunDe ko jo sūjhī duur kī

apne ik sāthī se bolā ki bha.ī

ho rahī hai jism meñ akḌan baḌī

is liye ho jaa.e kushtī bas abhī

shart hai āsān bilkul muft kī

haar jaa.e ham meñ se jo bhī abhī

vo Tapā kar laa.e bakrā jald hī

gosht us kā mil ke khā.īñ ham sabhī

ab koī jiite ki haare jaam.ī

jaan bakre kī yaqīnan jā.egī

ek sachcha waqia hai jami

aap samjhen to hai ek tamsil bhi

hain hamare ganw mein ek maulwi

jo bichaare hain bahut nadar bhi

ek bakra un ki punji hai wahi

did ke qabil hai jis ki farbahi

ek ghunDe ko jo sujhi dur ki

apne ek sathi se bola ki bhai

ho rahi hai jism mein akDan baDi

is liye ho jae kushti bas abhi

shart hai aasan bilkul muft ki

haar jae hum mein se jo bhi abhi

wo Tapa kar lae bakra jald hi

gosht us ka mil ke khain hum sabhi

ab koi jite ki haare jami

jaan bakre ki yaqinan jaegi