bandhan

daraḳht din raat kāñpte haiñ

parind kitne Dare hue haiñ

falak pe taare zamīñ pe jugnū

gharoñ ke andar chhupe ḳhazāne

kaTe phaTe sab badan purāne

qadīm chiknī tavīl Dorī meñ bañdh ga.e haiñ

kasīf Dar kī ġhalīz muTThī meñ aa ga.e haiñ

kahāñ ga.e vo diloñ ke bandhan

gulāb-hoñToñ kī narm qauseñ

zamīñ jo rākhī sī ban ke

sūraj ke haath par muskurā rahī thī

kahāñ ga.ī vo havā jo peñgeñ baḌhā rahī thī

vo sabz ḳhushbū jo band naafe

galī galī phir ke bāñTtī thī

vo haath thāme

nahīf jismoñ kī ek lambī qatār jis meñ

kahīñ bhī koī taḌaḳh nahīñ thī

ye kaun haiñ ham

jo sahme peḌoñ

Dare parindoñ larazte tāroñ

se bañdh ga.e haiñ

ḳhud apne sāyoñ se Dar ga.e haiñ

daraKHt din raat kanpte hain

parind kitne Dare hue hain

falak pe tare zamin pe jugnu

gharon ke andar chhupe KHazane

kaTe phaTe sab badan purane

qadim chikni tawil Dori mein bandh gae hain

kasif Dar ki ghaliz muTThi mein aa gae hain

kahan gae wo dilon ke bandhan

gulab-honTon ki narm qausen

zamin jo rakhi si ban ke

suraj ke hath par muskura rahi thi

kahan gai wo hawa jo pengen baDha rahi thi

wo sabz KHushbu jo band nafe

gali gali phir ke banTti thi

wo hath thame

nahif jismon ki ek lambi qatar jis mein

kahin bhi koi taDaKH nahin thi

ye kaun hain hum

jo sahme peDon

Dare parindon larazte taron

se bandh gae hain

KHud apne sayon se Dar gae hain