banjar KHayali ke din

ruuh bechain hai

chashm-e-pur-āb se bārishoñ kī tavaqqo.a bhī be-kār hai

lafz-gar sā.ateñ shā.irī ke tarannum se sarshār

to haiñ magar

nazm ke saat sur

merī kohna samā.at se Takrā ke

vāpas kahīñ jā chuke haiñ

mirī zaat ḳhāmoshiyoñ ke safar par ravāna hai

aur maiñ purāne gharoñ ke jharokoñ se

ta.abīr ke silsile joḌtī phir rahī huuñ

sabhī koshisheñ mustaqil be-natīja

naqāhat bharī zindagī se murassā

shafā.at kī tālib baġhāvat kī rasiyā

mere zā.iche

meñ likhī jā chukī haiñ

alif laam rā ke suḳhnavar mujhe

koī rasta dikhā

tā ki maiñ bhī pur-asrār vaqtoñ kī kunDalī

nikālūñ sarakte pighalte hue barr-e-āzam ke naqshe paḌhūñ

nīlgūñ āsmānoñ meñ bikhre hue bādaloñ ko nigalte hue mushtarī ke kisī chāñd par āftābī-sifat zā.icha likh sakūñ

raat ke ba.ad din to yaqīnī hai par aañkh kā kyā bharosa khule na khule vaqt kī Dor se bañdh ke chaltā huā ek saaya

ye jīvan mile na mile aur dhartī pe ḳhvāboñ kā sabza uge na uge

ai mere rāzdāñ merī chādar ki jis se hai lipTī huī ye ḳhizāñ

mere hāthoñ kī mehñdī meñ Duubī huī ye lakīr-e-nihāñ jis meñ aglī sadī kī haiñ ra.anā.iyāñ kho nā jaa.eñ kahīñ

mere hisse meñ likkhī huī āgahī so nā jaa.e kahīñ

ādam-e-avvalīñ kī tarah mujh ko asmā sikhā koī rasta dikhā

ruh bechain hai

chashm-e-pur-ab se barishon ki tawaqqoa bhi be-kar hai

lafz-gar saaten shairi ke tarannum se sarshaar

to hain magar

nazm ke sat sur

meri kohna samaat se Takra ke

wapas kahin ja chuke hain

meri zat KHamoshiyon ke safar par rawana hai

aur main purane gharon ke jharokon se

tabir ke silsile joDti phir rahi hun

sabhi koshishen mustaqil be-natija

naqahat bhari zindagi se murassa

shafaat ki talib baghawat ki rasiya

mere zaiche

mein likhi ja chuki hain

alif lam ra ke suKHnawar mujhe

koi rasta dikha

ta ki main bhi pur-asrar waqton ki kunDali

nikalun sarakte pighalte hue barr-e-azam ke naqshe paDhun

nilgun aasmanon mein bikhre hue baadalon ko nigalte hue mushtari ke kisi chand par aaftabi-sifat zaicha likh sakun

raat ke baad din to yaqini hai par aankh ka kya bharosa khule na khule waqt ki Dor se bandh ke chalta hua ek saya

ye jiwan mile na mile aur dharti pe KHwabon ka sabza uge na uge

ai mere raazdan meri chadar ki jis se hai lipTi hui ye KHizan

mere hathon ki mehndi mein Dubi hui ye lakir-e-nihan jis mein agli sadi ki hain ranaiyan kho na jaen kahin

mere hisse mein likkhi hui aagahi so na jae kahin

aadam-e-awwalin ki tarah mujh ko asma sikha koi rasta dikha