barf ke shahr ki viran guzar-gahon par

barf ke shahr kī vīrān guzargāhoñ par

mere hī naqsh-e-qadam mere sipāhī haiñ

mirā hausla haiñ

zindagiyāñ

apne gunāhoñ kī panah-gāhoñ meñ haiñ

raqs-kunāñ

raushaniyāñ

band darvāzoñ kī darzoñ se Tapaktī huī

qatra qatra

shab kī dahlīz pe girtī haiñ kabhī

koī mad.hosh sī le

jaama mai oḌh ke aatī hai guzar jaatī hai

raat kuchh aur biphar jaatī hai

aur baḌh jaatī haiñ ḳhāmosh khaḌī dīvāreñ

be-sadā sadiyoñ ke chūne se chunī dīvāreñ

jo ki maazī bhī haiñ mustaqbil bhī

jin ke pīchhe hai kahīñ

ātish-e-lamha-e-maujūd ki jo

lamha-e-maujūd kī hasrat hai

mirī nazm kī hairat hai jise

DhūñDhtā phirtā huuñ maiñ

ghūmtā phirtā huuñ maiñ barf bharī raat kī vīrānī meñ

an-kahī nazm kī tuġhyānī meñ

haiñ bhañvar kitne guhar kitne haiñ

kitne alāpeñ pas-e-parda lā

chashm-e-nā-bīnā ke āfāq meñ

kitne be-rañg kare

kitne dhanak rañg ḳhalā

kitne sapne haiñ ki jo

shahr ke tañg puloñ ke nīche

resturānoñ kī mahak oḌh ke so jaate haiñ

kitnī nīndeñ haiñ ki jo apne shabistānoñ meñ

valium chāTtī haiñ

jāgtī haiñ

barf ke shahr ki viran guzargahon par

mere hi naqsh-e-qadam mere sipahi hain

mera hausla hain

zindagiyan

apne gunahon ki panah-gahon mein hain

raqs-kunan

raushaniyan

band darwazon ki darzon se Tapakti hui

qatra qatra

shab ki dahliz pe girti hain kabhi

koi madhosh si le

jama mai oDh ke aati hai guzar jati hai

raat kuchh aur biphar jati hai

aur baDh jati hain KHamosh khaDi diwaren

be-sada sadiyon ke chune se chuni diwaren

jo ki mazi bhi hain mustaqbil bhi

jin ke pichhe hai kahin

aatish-e-lamha-e-maujud ki jo

lamha-e-maujud ki hasrat hai

meri nazm ki hairat hai jise

DhunDhta phirta hun main

ghumta phirta hun main barf bhari raat ki virani mein

an-kahi nazm ki tughyani mein

hain bhanwar kitne guhar kitne hain

kitne alapen pas-e-parda la

chashm-e-na-bina ke aafaq mein

kitne be-rang kare

kitne dhanak rang KHala

kitne sapne hain ki jo

shahr ke tang pulon ke niche

resturanon ki mahak oDh ke so jate hain

kitni ninden hain ki jo apne shabistanon mein

walium chaTti hain

jagti hain