barf ki ek safed chadar par

mazhab-o-rang kī siyāsat ne

merī firdaus merī jannat kā

rang aur nuur hī badal Daalā

puurā dastūr hī badal Daalā

nafratoñ kī havā chalā.ī ga.ī

zāfrānī fazā banā.ī ga.ī

ḳhuun ko ḳhaak meñ milāyā gayā

sabz tahzīb ko miTāyā gayā

gulsitāñ kā nizām badlā gayā

aur pa.e-intiqām badlā gayā

jabr ke rāste nikāle ga.e

aur javāñ peḌ kaaT Daale ga.e

Tahniyāñ kāñptī laraztī rahīñ

sahme sahme gulāb toḌe ga.e

phuul aur pattiyoñ kā zikr hī kyā

ġhunche bhī shāḳh par na chhoḌe ga.e

titliyoñ ke paroñ ko maslā gayā

jugnū sangīn meñ piro.e ga.e

pyaas bhī ḳhuun se bujhā.ī ga.ī

zaḳhm bhī ḳhuun hī se dho.e ga.e

barf kī ik safed chādar par

ḳhuun se ik payām likkhā gayā

amn insāñ ke naam likhā gayā

log ab pūchhte haiñ ai 'tāriq'

ḳhuuñ se likkhā payām kis kā hai

ye bhī likh do ki naam kis kā hai

mazhab-o-rang ki siyasat ne

meri firdaus meri jannat ka

rang aur nur hi badal Dala

pura dastur hi badal Dala

nafraton ki hawa chalai gai

zafrani faza banai gai

KHun ko KHak mein milaya gaya

sabz tahzib ko miTaya gaya

gulsitan ka nizam badla gaya

aur pae-intiqam badla gaya

jabr ke raste nikale gae

aur jawan peD kaT Dale gae

Tahniyan kanpti larazti rahin

sahme sahme gulab toDe gae

phul aur pattiyon ka zikr hi kya

ghunche bhi shaKH par na chhoDe gae

titliyon ke paron ko masla gaya

jugnu sangin mein piroe gae

pyas bhi KHun se bujhai gai

zaKHm bhi KHun hi se dhoe gae

barf ki ek safed chadar par

KHun se ek payam likkha gaya

amn insan ke nam likha gaya

log ab puchhte hain ai 'tariq'

KHun se likkha payam kis ka hai

ye bhi likh do ki nam kis ka hai