barkha ki ek subh

saarī raat kā jaagā thā maiñ

aur barkhā kī bhīgī sub.h meñ

terī yaad kī chādar oḌh ke

aañkh lagī thī

uTh kar dekhā jab to

sūraj aag kā golā dahak rahā thā

ghaas pe nam kā halkā sā bhī

naqsh nahīñ thā

din pe pichhlī raat ke

ḳhvāb kī

ek bhī chhīñT nahīñ thī baaqī

dhuup hare dālān meñ baiThī

uuñgh rahī thī

jism kī chhāl pe

khude hue kuchh naam nahīñ the

un kī jagah kuchh zang lage se

kiil Tañge the

jin pe pichhlī raat kī yādeñ

yuuñ aTkī thiiñ

jaise be-ābād gharoñ par

zang lage taale laTke hoñ

sari raat ka jaga tha main

aur barkha ki bhigi subh mein

teri yaad ki chadar oDh ke

aankh lagi thi

uTh kar dekha jab to

suraj aag ka gola dahak raha tha

ghas pe nam ka halka sa bhi

naqsh nahin tha

din pe pichhli raat ke

KHwab ki

ek bhi chhinT nahin thi baqi

dhup hare dalan mein baiThi

ungh rahi thi

jism ki chhaal pe

khude hue kuchh nam nahin the

un ki jagah kuchh zang lage se

kil Tange the

jin pe pichhli raat ki yaaden

yun aTki thin

jaise be-abaad gharon par

zang lage tale laTke hon