barsat ki sham

kis qadar dilkash suhānī shaam hai barsāt kī

bolne vaalī hai ab tasvīr goyā raat kī

dāman-e-maġhrib meñ poshīda ruḳh-e-ḳhurshīd hai

aamad aamad hai qamar kī us kā shauq-e-dīd hai

ḳhāma-e-qudrat ke pā-e-Dhab shafaq ke rañg meñ

sar-ba-sar Duube hue haiñ sab shafaq ke rañg meñ

sar uThā kar āsmāñ kī jāma-zebī dekhiye

us kī rañgīnī meñ kyā hai dil-farebī dekhiye

ye rū-pahlā ye sunahrā rañg hī kuchh aur hai

rañg hī kuchh aur be-shak Dhañg hī kuchh aur hai

kaam sone kā banā hai gumbad-e-aflāk par

zau-fagan hotā hai aalam is kā farsh-e-ḳhāk par

bazm-e-gardūñ par huā hai anjuman-ārā koī

jhāñktā parde se hai shāyad ye mah-pāra koī

maiñ na kyuuñ qurbān jā.ūñ is adā is Dhañg ke

āsmāñ par khil rahe haiñ phuul lākhoñ rañg ke

haiñ lakīreñ muḳhtalif rañgoñ kī rañgīñ daaġh hai

ye ḳhudā kī shaan hai kyā āsmāñ par baaġh hai

shaam hai barsāt kī dilchasp manzar saath hai

dekhiye hotā hai kyā qudrat kā is meñ haath hai

sūrat-e-tasvīr chup 'bismil' hue ye bol kar

husn kī duniyā hai dekho dīda-e-dil khol kar

kis qadar dilkash suhani sham hai barsat ki

bolne wali hai ab taswir goya raat ki

daman-e-maghrib mein poshida ruKH-e-KHurshid hai

aamad aamad hai qamar ki us ka shauq-e-did hai

KHama-e-qudrat ke pa-e-Dhab shafaq ke rang mein

sar-ba-sar Dube hue hain sab shafaq ke rang mein

sar uTha kar aasman ki jama-zebi dekhiye

us ki rangini mein kya hai dil-farebi dekhiye

ye ru-pahla ye sunahra rang hi kuchh aur hai

rang hi kuchh aur be-shak Dhang hi kuchh aur hai

kaam sone ka bana hai gumbad-e-aflak par

zau-fagan hota hai aalam is ka farsh-e-KHak par

bazm-e-gardun par hua hai anjuman-ara koi

jhankta parde se hai shayad ye mah-para koi

main na kyun qurban jaun is ada is Dhang ke

aasman par khil rahe hain phul lakhon rang ke

hain lakiren muKHtalif rangon ki rangin dagh hai

ye KHuda ki shan hai kya aasman par bagh hai

sham hai barsat ki dilchasp manzar sath hai

dekhiye hota hai kya qudrat ka is mein hath hai

surat-e-taswir chup 'bismil' hue ye bol kar

husn ki duniya hai dekho dida-e-dil khol kar