bastiyan zinda rahengi

tum zamīñ par ek bhī saaya agar dekho to samjho āsmānoñ ke tale ye bastiyāñ zinda raheñgī

vo jo mātam kar rahe haiñ ro rahe haiñ apne bachchoñ ko

nahīñ aatā yaqīñ un ko vo jiite haiñ ab tak titliyāñ un ke ta.āqub meñ ga.ī haiñ

vo jo mātam kar rahe haiñ apne bachchoñ kā

unheñ kah do

pahāḌoñ se nidā aatī nahīñ to ye na socheñ shahr murda ho ga.e haiñ

aaj kī tārīḳh meñ sūraj na chamke gar makānoñ par

to ye matlab na lo zulmat muqaddar ho chukī hai

raat ke us paar bhī ik raat hai lambī anokhī aur Darāonī raat ye sach hai

ki us ke haath meñ tasvīr hai ik sail-e-hairat kī

jo mātam kar rahe haiñ un se ye kah do

lahū bahtā hai jab ābādiyoñ meñ tañg aur tārīk rastoñ par

to ik āvāz aatī hai

hazāroñ haath uThte haiñ

fasīloñ se pare bhī chīḳh kī āvāz lambī guuñj ban kar kauñdtī rahtī hai sadiyoñ tak

Darāvne lafz giddhoñ kī tarah uḌte haiñ shahroñ par

koī kitnā bhī Dar kar band kar le ghar ke darvāze

magar vo chain se battī bujhā kar so nahīñ saktā

añdhere meñ hazāroñ haath uThte haiñ

añdhere meñ hazāroñ chīḳhte haiñ bhuut ban ban kar Darāte haiñ

jo mātam kar rahe haiñ un se ye kah do

samajh leñ āsmānoñ ke tale ye jagmagātī bastiyāñ zinda raheñgī

mar nahīñ saktīñ

tum zamin par ek bhi saya agar dekho to samjho aasmanon ke tale ye bastiyan zinda rahengi

wo jo matam kar rahe hain ro rahe hain apne bachchon ko

nahin aata yaqin un ko wo jite hain ab tak titliyan un ke taaqub mein gai hain

wo jo matam kar rahe hain apne bachchon ka

unhen kah do

pahaDon se nida aati nahin to ye na sochen shahr murda ho gae hain

aaj ki tariKH mein suraj na chamke gar makanon par

to ye matlab na lo zulmat muqaddar ho chuki hai

raat ke us par bhi ek raat hai lambi anokhi aur Daraoni raat ye sach hai

ki us ke hath mein taswir hai ek sail-e-hairat ki

jo matam kar rahe hain un se ye kah do

lahu bahta hai jab aabaadiyon mein tang aur tarik raston par

to ek aawaz aati hai

hazaron hath uThte hain

fasilon se pare bhi chiKH ki aawaz lambi gunj ban kar kaundti rahti hai sadiyon tak

Darawne lafz giddhon ki tarah uDte hain shahron par

koi kitna bhi Dar kar band kar le ghar ke darwaze

magar wo chain se batti bujha kar so nahin sakta

andhere mein hazaron hath uThte hain

andhere mein hazaron chiKHte hain bhut ban ban kar Daraate hain

jo matam kar rahe hain un se ye kah do

samajh len aasmanon ke tale ye jagmagati bastiyan zinda rahengi

mar nahin saktin