baTwara

achchhā-ḳhāsā

baḌā sā makāñ thā

baT gayā

Dher saarī lakīroñ ke darmiyāñ aa gayā

pūrvajoñ kā lagāyā huā peḌ

kaT gayā

saarī dahlīz

har koTharī

baḌā sā dālān

jo purkhoñ kī faiyyaz tabī.at kā maz.har bhī thā

chhoTī-chhoTī sī ḳhvāhishoñ ke sāmne

surangoñ sā ho gayā

aur phir

baḌe se āñgan ke dil meñ bhī

ḳhanjar gaḌā

mogrā

amrūd

aur papīte ke peḌ

ik dūsre se ajnabī ho ga.e

vo usārā jahāñ

daadā dūsroñ ke saath baiTh kar

khet fasleñ aur khaliyān

aur gaañv ke dūsre mas.aloñ par

faisla karte hue usī miTTī meñ kho ga.e

us usāre meñ ek din

saarī rūheñ ikaTThī huiiñ

sab hī hasrat se takte rahe

vo baḌā sā makāñ

jo ka.ī hisse meñ munqasim ho chukā thā

sab fasurda malūl aur dil-shikasta se the

aaj ik savāl un kī āñkhoñ meñ thā

baḌe se makāñ ke ye chhoTe se hisse

aglī nasloñ meñ kaise baTe.ge

achchha-KHasa

baDa sa makan tha

baT gaya

Dher sari lakiron ke darmiyan aa gaya

purwajon ka lagaya hua peD

kaT gaya

sari dahliz

har koThari

baDa sa dalan

jo purkhon ki faiyyaz tabiat ka mazhar bhi tha

chhoTi-chhoTi si KHwahishon ke samne

surangon sa ho gaya

aur phir

baDe se aangan ke dil mein bhi

KHanjar gaDa

mogra

amrud

aur papite ke peD

ek dusre se ajnabi ho gae

wo usara jahan

dada dusron ke sath baiTh kar

khet faslen aur khaliyan

aur ganw ke dusre masalon par

faisla karte hue usi miTTi mein kho gae

us usare mein ek din

sari ruhen ikaTThi huin

sab hi hasrat se takte rahe

wo baDa sa makan

jo kai hisse mein munqasim ho chuka tha

sab fasurda malul aur dil-shikasta se the

aaj ek sawal un ki aankhon mein tha

baDe se makan ke ye chhoTe se hisse

agli naslon mein kaise baTege