bauna

ek kahāvat maiñ ne sunī hai

pahle kāġhaz par akbar ne ik ḳhat khīñchā

bīrbal se nok-jhoñk ke lahje meñ phir

ye farmāyā

binā ghaTā.e binā miTā.e kyā tum mere ḳhat ko chhoTā kar sakte ho

pal bhar ko to us ne sochā lekin

phir us ḳhat ke madd-e-muqābil

us se lambā ik ḳhat khīñchā

aur kahā ai zill-e-ilāhī

aap kā ḳhat ab mere ḳhat se kitnā chhoTā lagne lagā hai

chhoTe baḌoñ kī is duniyā meñ

mere qad se jalne vaalo

apne qad ko ūñchā karne kā fan sīkho

maiñ to ḳhud hī chhoTā lagne lag jā.uñgā

tum ko ḳhush karne kī ḳhātir

tum hī kaho

maiñ chāhūñ bhī to

apne qad ko kaise chhoTā kar saktā huuñ

ek kahawat main ne suni hai

pahle kaghaz par akbar ne ek KHat khincha

birbal se nok-jhonk ke lahje mein phir

ye farmaya

bina ghaTae bina miTae kya tum mere KHat ko chhoTa kar sakte ho

pal bhar ko to us ne socha lekin

phir us KHat ke madd-e-muqabil

us se lamba ek KHat khincha

aur kaha ai zill-e-ilahi

aap ka KHat ab mere KHat se kitna chhoTa lagne laga hai

chhoTe baDon ki is duniya mein

mere qad se jalne walo

apne qad ko uncha karne ka fan sikho

main to KHud hi chhoTa lagne lag jaunga

tum ko KHush karne ki KHatir

tum hi kaho

main chahun bhi to

apne qad ko kaise chhoTa kar sakta hun