be-karan silsila

zehn meñ bil-yaqīñ koī naqsha na thā

kho gayā jazba-e-dil ḳhalā-dar-ḳhalā

rāstoñ se alag thā mirā rāsta

jaise maiñ duur kī ek āvāz thā

dam-ba-dam āgahī ko tarastā rahā

kaun mere liye māñgtā thā duā

miTTiyoñ kī mahak ab havā meñ na thī

lab pe machlā kiyā zā.iqa ajnabī

tishnagī rah ga.ī sochtī sochtī

nāchtī hī rahī ek be-kal sadā

ek TuuTā huā saaz khankā kiyā

kaun mere liye māñgtā thā duā

ik shikasta se nashshe kī bechārgī

baañT kar niim ḳhvābī kahīñ so ga.ī

aañkh se ik namī sī barastī rahī

rah gayā phir vahī be-karāñ silsila

siskiyoñ meñ vo manzar hī Duubā kiyā

kaun mere liye māñgtā thā duā

har nafas aañch sī ik sulagtī rahī

haañ samar thā vafāoñ kā shāyad yahī

har qadam har qadam nit na.ī gumrahī

fāsla qurbatoñ kī sazā ban gayā

kaun mere liye māñgtā thā duā

aaj siine meñ mahfūz kar bhī liye

dhaḌkanoñ ke ka.ī narm rishte na.e

qurbatoñ meñ hue anginat hādse

jab vafāoñ kā phir us ne va.ada kiyā

ik ta'alluq badan-bhar machal sā gayā

kaun mere liye māñgtā thā duā

vo jo ugne lagī thī ḳhabar ik hasīñ

ham ne ḳhvāb ek boyā thā shāyad kahīñ

sabz pā kar ta'alluq kī banjar zamīñ

kuchh salīqa gunāhoñ meñ aa hī gayā

ek raqs-e-hasīñ aarzū kā rahā

kaun mere liye māñgtā thā duā

dilkashī aarzū kī na bahlā sakī

shaam aisī ki jis kī sahar na huī

raat kī ḳhāmushī ḳhāmushī hī rahī

lazzateñ ġham kā jhoñkā churā le gayā

āshnā ho gayā aaj nā-āshnā

kaun mere liye māñgtā thā duā

ho ke ġharq-e-tasavvur na ham so sake

ḳhvāb to ḳhvāb the ḳhvāb hī rah ga.e

āsmāñ ke pare āsmāñ the na.e

zehn ehsās kā sochtā rah gayā

āḳhirash aadmī kā muqaddar hai kyā

kaun mere liye māñgtā thā duā

zehn mein bil-yaqin koi naqsha na tha

kho gaya jazba-e-dil KHala-dar-KHala

raston se alag tha mera rasta

jaise main dur ki ek aawaz tha

dam-ba-dam aagahi ko tarasta raha

kaun mere liye mangta tha dua

miTTiyon ki mahak ab hawa mein na thi

lab pe machla kiya zaiqa ajnabi

tishnagi rah gai sochti sochti

nachti hi rahi ek be-kal sada

ek TuTa hua saz khanka kiya

kaun mere liye mangta tha dua

ek shikasta se nashshe ki bechaargi

banT kar nim KHwabi kahin so gai

aankh se ek nami si barasti rahi

rah gaya phir wahi be-karan silsila

siskiyon mein wo manzar hi Duba kiya

kaun mere liye mangta tha dua

har nafas aanch si ek sulagti rahi

han samar tha wafaon ka shayad yahi

har qadam har qadam nit nai gumrahi

fasla qurbaton ki saza ban gaya

kaun mere liye mangta tha dua

aaj sine mein mahfuz kar bhi liye

dhaDkanon ke kai narm rishte nae

qurbaton mein hue anginat hadse

jab wafaon ka phir us ne wada kiya

ek ta'alluq badan-bhar machal sa gaya

kaun mere liye mangta tha dua

wo jo ugne lagi thi KHabar ek hasin

hum ne KHwab ek boya tha shayad kahin

sabz pa kar ta'alluq ki banjar zamin

kuchh saliqa gunahon mein aa hi gaya

ek raqs-e-hasin aarzu ka raha

kaun mere liye mangta tha dua

dilkashi aarzu ki na bahla saki

sham aisi ki jis ki sahar na hui

raat ki KHamushi KHamushi hi rahi

lazzaten gham ka jhonka chura le gaya

aashna ho gaya aaj na-ashna

kaun mere liye mangta tha dua

ho ke gharq-e-tasawwur na hum so sake

KHwab to KHwab the KHwab hi rah gae

aasman ke pare aasman the nae

zehn ehsas ka sochta rah gaya

aaKHirash aadmi ka muqaddar hai kya

kaun mere liye mangta tha dua