be-karan wusaton mein tanha

safar meñ huuñ aur rukā khaḌā huuñ

maiñ chāroñ samtoñ meñ chal rahā huuñ magar kahāñ huuñ

vahīñ jahāñ surḳh raushnā.ī kā ek qatra

kisī qalam kī kasīf nib se Tapak paḌā hai

maiñ ḳhud bhī shāyad kisī qalam se girā huā ek surḳh qatra huuñ

zindagī kī sajal jabīñ par chamaktī bindiyā sī ban gayā huuñ

magar maiñ bindiyā nahīñ huuñ shāyad ki vo to taqdīs kā nishāñ hai

diloñ ke dhāgoñ kī ik girah hai

girah jo sadiyoñ meñ banñe vaale hasīn rishtoñ kā āshram hai

jo aane vaale taḌaptī sadiyoñ kī ibtidā hai

girah to junction hai pTriyoñ kā musāfiroñ kā na.ī-navelī rafāqatoñ kā

mohabbatoñ kā aziyyatoñ kā

magar maiñ tanhā huuñ be-karāñ vus.atoñ meñ tanhā

safed maazī safed fardā safed ye lamha-e-ibādat

ki jis pe koī nahīñ ibārat

safed māthe pe surḳh dhabba huuñ

ibtidā intihā ke dhāgoñ se kaT chukā huuñ

maiñ surḳh dhabba huuñ

kapkapāte latīf aksoñ kā silsila huuñ

tamām chehre jo tere andar se jhāñkte haiñ

mire hī chehre kī jhalkiyāñ haiñ

mire hī siine kī dhaḌkaneñ haiñ

ye tez rañgoñ ke tund dariyā

jo dukh ke koh-e-girāñ se ras kar

zamīñ kī banjar udaas sī saltanat ko chhū kar

us ek be-ant surḳh nuqte ke bahr-e-zulmāt meñ gire haiñ

mire hī be-nām dast-o-pā haiñ

ye jagmagātī sī kahkashā.eñ jo ibtidā se

ḳhalā kī zulmat meñ qaid bāhar ko uḌ rahī haiñ

girheñ banī haiñ

vahīñ khaḌī haiñ

vahīñ jahāñ surḳh raushnā.ī kā ek qatra

kisī qalam kī kasīf nib se Tapak paḌā hai

vo ek qatra jo merā dil hai

jo mere aksoñ kā silsila hai

jo mere hone se surḳh-rū hai

jo merī pā-basta aarzū hai

safar mein hun aur ruka khaDa hun

main chaaron samton mein chal raha hun magar kahan hun

wahin jahan surKH raushnai ka ek qatra

kisi qalam ki kasif nib se Tapak paDa hai

main KHud bhi shayad kisi qalam se gira hua ek surKH qatra hun

zindagi ki sajal jabin par chamakti bindiya si ban gaya hun

magar main bindiya nahin hun shayad ki wo to taqdis ka nishan hai

dilon ke dhagon ki ek girah hai

girah jo sadiyon mein banne wale hasin rishton ka aashram hai

jo aane wale taDapti sadiyon ki ibtida hai

girah to junction hai pTriyon ka musafiron ka nai-naweli rafaqaton ka

mohabbaton ka aziyyaton ka

magar main tanha hun be-karan wusaton mein tanha

safed mazi safed farda safed ye lamha-e-ibaadat

ki jis pe koi nahin ibarat

safed mathe pe surKH dhabba hun

ibtida intiha ke dhagon se kaT chuka hun

main surKH dhabba hun

kapkapate latif akson ka silsila hun

tamam chehre jo tere andar se jhankte hain

mere hi chehre ki jhalkiyan hain

mere hi sine ki dhaDkanen hain

ye tez rangon ke tund dariya

jo dukh ke koh-e-giran se ras kar

zamin ki banjar udas si saltanat ko chhu kar

us ek be-ant surKH nuqte ke bahr-e-zulmat mein gire hain

mere hi be-nam dast-o-pa hain

ye jagmagati si kahkashaen jo ibtida se

KHala ki zulmat mein qaid bahar ko uD rahi hain

girhen bani hain

wahin khaDi hain

wahin jahan surKH raushnai ka ek qatra

kisi qalam ki kasif nib se Tapak paDa hai

wo ek qatra jo mera dil hai

jo mere akson ka silsila hai

jo mere hone se surKH-ru hai

jo meri pa-basta aarzu hai