be-nur kaenat mein ek kanch ka charagh

be-nūr kā.enāt meñ ik kāñch kā charāġh

kaafī hai shash-jihāt meñ ik kāñch kā charāġh

bujhtā hai TūTtā hai ki jaltā hai raah meñ

āñdhī hai aur haath meñ ik kāñch kā charāġh

terī nazar se jaagī huī lau ke faiz se

raushan hai merī zaat meñ ik kāñch kā charāġh

kaTtī hai saḳht raah kī ḳhāmosh tīrgī

jaltā hai terī baat meñ ik kāñch kā charāġh

kahte haiñ raat bhar koī nā-bīnā shahr meñ

phirtā thā le ke haath meñ ik kāñch kā charāġh

tāroñ kī raushnī kā zaḳhīra sameT kar

us ne diyā zakāt meñ ik kāñch kā charāġh

patthar kī sāzishoñ se bachā thā to luT gayā

āñdhī kī vārdāt meñ ik kāñch kā charāġh

sho.aloñ ke aur kirchiyoñ ke zaḳhm thaam kar

baiThā hai merī ghaat meñ ik kāñch kā charāġh

merī kamīn-gāh kī dushman ko de ḳhabar

shāmil hai merī maat meñ ik kāñch kā charāġh

sotā rahegā chain kī ye niiñd shaam tak

thā be-qarār raat meñ ik kāñch kā charāġh

mil kar manā rahe haiñ kisī rat-jage kī yaad

āñkheñ hamārī saath meñ ik kāñch kā charāġh

andhe safar meñ sau tarah se kaam aa gayā

har ḳhauf se najāt meñ ik kāñch kā charāġh

be-nur kaenat mein ek kanch ka charagh

kafi hai shash-jihat mein ek kanch ka charagh

bujhta hai TuTta hai ki jalta hai rah mein

aandhi hai aur hath mein ek kanch ka charagh

teri nazar se jagi hui lau ke faiz se

raushan hai meri zat mein ek kanch ka charagh

kaTti hai saKHt rah ki KHamosh tirgi

jalta hai teri baat mein ek kanch ka charagh

kahte hain raat bhar koi na-bina shahr mein

phirta tha le ke hath mein ek kanch ka charagh

taron ki raushni ka zaKHira sameT kar

us ne diya zakat mein ek kanch ka charagh

patthar ki sazishon se bacha tha to luT gaya

aandhi ki wardat mein ek kanch ka charagh

shoalon ke aur kirchiyon ke zaKHm tham kar

baiTha hai meri ghat mein ek kanch ka charagh

meri kamin-gah ki dushman ko de KHabar

shamil hai meri mat mein ek kanch ka charagh

sota rahega chain ki ye nind sham tak

tha be-qarar raat mein ek kanch ka charagh

mil kar mana rahe hain kisi rat-jage ki yaad

aankhen hamari sath mein ek kanch ka charagh

andhe safar mein sau tarah se kaam aa gaya

har KHauf se najat mein ek kanch ka charagh