be-zabani ka ehsas

mahaktī vādiyoñ meñ

jab bhī jhīñgar shor karte haiñ

havā.eñ jab bhī Takrātī haiñ in būḌhe daraḳhtoñ se

maiñ in kī āhaToñ par chauñk paḌtā huuñ

mirī āñkheñ

bhaTaktī haiñ ḳhalāoñ meñ

mirā ehsās yuuñ bedār hotā hai

ki jaise

ek muddat par

mirī ye āñkheñ jaagī hoñ

maiñ hasrat se daraḳhtoñ ke ghane pattoñ kā

jab bhī shor suntā huuñ

to aksar sochtā huuñ ye

mirī duniyā kī har shai ko

ḳhudā ne quvvat-e-goyā.ī baḳhshī hai

magar maiñ kis liye ḳhāmosh rahtā huuñ

mire muñh meñ

zabāñ jaisī koī shai hī nahīñ hai kyā

mahakti wadiyon mein

jab bhi jhingar shor karte hain

hawaen jab bhi Takraati hain in buDhe daraKHton se

main in ki aahaTon par chaunk paDta hun

meri aankhen

bhaTakti hain KHalaon mein

mera ehsas yun bedar hota hai

ki jaise

ek muddat par

meri ye aankhen jagi hon

main hasrat se daraKHton ke ghane patton ka

jab bhi shor sunta hun

to aksar sochta hun ye

meri duniya ki har shai ko

KHuda ne quwwat-e-goyai baKHshi hai

magar main kis liye KHamosh rahta hun

mere munh mein

zaban jaisi koi shai hi nahin hai kya