be-zamiri

zamīñ ghūmī

havā badlī

chalo mausam badaltā hai

'salīm' ab tum pahāḌoñ se utar aao

vo dekho

chiyūñTiyoñ ke par nikal aa.e

kaise uḌtī phir rahī haiñ

aaj shān-e-be-niyāzī se

ki jaise mutma.in haiñ

makḌiyoñ kī sarfarāzī se

'salīm' ab tum pahāḌoñ se utar aao

tumhārī duur kī āvāz kaise guuñj ban kar

palaT aa.ī hai

jaise bastiyoñ ke

sabhī ghar hue haiñ

koī hathiyār bhī sālim nahīñ

nukīle daañt

kāñTe

Dañk

nāḳhun

hifāzat ke sabhī sāmān jaise chhin ga.e haiñ

tabhī to zālimoñ se

chand roza āfiyat kī bhiik pā kar

ḳhudā kī god meñ be-fikr sote haiñ

samajhte haiñ

ki mazlūmī kā ye bahrūp hī

fiqara-e-qanā.at kā badal hai

koī patthar uThā.e khīñch maare

dikhāve ke liye patthar uThā kar chuum leñge

ye kis duniyā meñ baste haiñ

ye kis kā paas rakhte haiñ

ḳhud apnī maut kī nazzārgī kā zaḳhm de kar

darindoñ kī nigāhoñ se

ulūhī raushnī kī aas rakhte haiñ

'salīm' ab tum pahāḌoñ se utar aao

tumhāre raaz tum hī jānte ho

sab kuchh jhuuT hai ik Dhoñg hai

ham meñ koī

ayyūb hai budh hai

husain-ibn-e-alī aur na iisā hai

bas itnā hai zamīr apnā kabhī kā bik chukā hai

añdhere kī panah-gāhoñ meñ

sehr-e-sāmrī se

aaj sab mab.hūt haiñ

haath paañv zehn sab maflūj haiñ

sone kā bachhḌā boltā hai

zamin ghumi

hawa badli

chalo mausam badalta hai

'salim' ab tum pahaDon se utar aao

wo dekho

chiyunTiyon ke par nikal aae

kaise uDti phir rahi hain

aaj shan-e-be-niyazi se

ki jaise mutmain hain

makDiyon ki sarfaraazi se

'salim' ab tum pahaDon se utar aao

tumhaari dur ki aawaz kaise gunj ban kar

palaT aai hai

jaise bastiyon ke

sabhi ghar hue hain

koi hathiyar bhi salim nahin

nukile dant

kanTe

Dank

naKHun

hifazat ke sabhi saman jaise chhin gae hain

tabhi to zalimon se

chand roza aafiyat ki bhik pa kar

KHuda ki god mein be-fikr sote hain

samajhte hain

ki mazlumi ka ye bahrup hi

fiqara-e-qanaat ka badal hai

koi patthar uThae khinch mare

dikhawe ke liye patthar uTha kar chum lenge

ye kis duniya mein baste hain

ye kis ka pas rakhte hain

KHud apni maut ki nazzargi ka zaKHm de kar

darindon ki nigahon se

uluhi raushni ki aas rakhte hain

'salim' ab tum pahaDon se utar aao

tumhaare raaz tum hi jaante ho

sab kuchh jhuT hai ek Dhong hai

hum mein koi

ayyub hai budh hai

husain-ibn-e-ali aur na isa hai

bas itna hai zamir apna kabhi ka bik chuka hai

andhere ki panah-gahon mein

sehr-e-samri se

aaj sab mabhut hain

hath panw zehn sab mafluj hain

sone ka bachhDa bolta hai