bebasi

ye bhaTaktī huī rūheñ ye nasheb aur farāz

terī mahfil meñ farozāñ na huī sham.a-e-niyāz

tujh ko taklīf-e-samā.at rahī merī āvāz

āñsūoñ se na huī sard tirī ātish-e-nāz

mehr-o-ulfat ke tarāne rahe ḳhvābīda-e-nāz

ishq bechāra samajhtā hai jise sub.h-e-chaman

paikar-e-sub.h meñ ik raat hai vīrāne kī

gardish-e-rang se taz.īn-e-nazar kyā hotī

haañ mirī raah tirī rāhguzar kyā hotī

tujh ko bīmār-e-mohabbat kī ḳhabar kyā hotī

hijr kī raat ham-āġhosh-e-sahar kyā hotī

jis ko maiñ soz-e-haqīqat kā nishāñ kahtā thā

muhr thī vo kisī tārīk nihāñ-ḳhāne kī

aaj tak mil na sakī bār-e-tamannā se najāt

aaj tak tishna-e-ta.abīr rahā ḳhvāb-e-hayāt

kaash hotā na mire zauq-e-farāvāñ meñ sabāt

ye masā.ib kā julūs aur ye āfāt kī raat

ye aqīdoñ kā talātum ye añdhere kā ḳharosh

maiñ nahīñ laash hai goyā kisī parvāne kī

ek ik jumbish-e-lab āh-o-fuġhāñ kā paiġhām

ye sarāboñ ke pujārī ye ġhulāmoñ ke ġhulām

majlis-e-jaur-o-jafā kārgah-e-dāna-o-dām

haa.e ye terī ḳhudā.ī kā jahāñ-soz nizām

haiñ yahāñ kitne ujāloñ pe dhuñdalkoñ ke ġhilāf

dahr hai yā koī tasvīr siyah-ḳhāne kī

ab nahīñ bā.is-e-taskīñ tirī āyāt-e-jamīl

sāl-hā-sāl se insān kī fitrat hai aliil

TimTimātī hī rahegī mire dil kī qindīl

ye siyāhī hai ki baḌhtī huī zulmat kī dalīl

zulmat-e-yās hai taarī na kar ab sa.ī-e-fuzūl

mere ā.īna-e-kirdār ko chamkāne kī

ye bhaTakti hui ruhen ye nasheb aur faraaz

teri mahfil mein farozan na hui shama-e-niyaz

tujh ko taklif-e-samaat rahi meri aawaz

aansuon se na hui sard teri aatish-e-naz

mehr-o-ulfat ke tarane rahe KHwabida-e-naz

ishq bechaara samajhta hai jise subh-e-chaman

paikar-e-subh mein ek raat hai virane ki

gardish-e-rang se tazin-e-nazar kya hoti

han meri rah teri rahguzar kya hoti

tujh ko bimar-e-mohabbat ki KHabar kya hoti

hijr ki raat ham-aghosh-e-sahar kya hoti

jis ko main soz-e-haqiqat ka nishan kahta tha

muhr thi wo kisi tarik nihan-KHane ki

aaj tak mil na saki bar-e-tamanna se najat

aaj tak tishna-e-tabir raha KHwab-e-hayat

kash hota na mere zauq-e-farawan mein sabaat

ye masaib ka julus aur ye aafat ki raat

ye aqidon ka talatum ye andhere ka KHarosh

main nahin lash hai goya kisi parwane ki

ek ek jumbish-e-lab aah-o-fughan ka paigham

ye sarabon ke pujari ye ghulamon ke ghulam

majlis-e-jaur-o-jafa kargah-e-dana-o-dam

hae ye teri KHudai ka jahan-soz nizam

hain yahan kitne ujalon pe dhundalkon ke ghilaf

dahr hai ya koi taswir siyah-KHane ki

ab nahin bais-e-taskin teri aayat-e-jamil

sal-ha-sal se insan ki fitrat hai alil

TimTimati hi rahegi mere dil ki qindil

ye siyahi hai ki baDhti hui zulmat ki dalil

zulmat-e-yas hai tari na kar ab sai-e-fuzul

mere aaina-e-kirdar ko chamkane ki