bewa ki jawani

bechārī ke ārām kī sūrat hī kahāñ hai

beva kī javānī bhī ajab āfat-e-jāñ hai

mumkin hai ki piirī meñ sukūñ pā sake varna

jab tak vo javāñ hai ġham-e-shauhar bhī javāñ hai

mamtā se hai majbūr ki aulād kī ḳhātir

jiitī hai magar jiinā ba-har-rañg garāñ hai

ḳhūñ-gashtagī-e-dil kī davā ho nahīñ saktī

kyā ḳhaak thame ḳhuuñ ki jo āñkhoñ se ravāñ hai

be-laus mohabbat kā sila dā.imī furqat

ai sāhab-e-insāf ye insāf kahāñ hai

dil TuuT to saktā hai magar juḌ nahīñ saktā

ab ye bhī ajab silsila shīsha-garāñ hai

fariyād kare bhī to kare kis se ki āḳhir

fariyād kī qīmat na yahāñ hai na vahāñ hai

ye malgajī chādar ye labāda shikan-ālūd

allāh na kare tū kahīñ beva to nahīñ hai

bhar aa.ī huī āñkhoñ meñ Thahre hue aañsū

ye nīchī nazar vājib-e-sajda to nahīñ hai

is dard-e-mujassam ko bhī to ghuur rahā hai

sho.ala kahīñ dozaḳh kā irāda to nahīñ hai

manzil kā nishāñ kho ga.e gum-karda-rahī se

ye rāsta firdaus kā jaada to nahīñ hai

bechaari ke aaram ki surat hi kahan hai

bewa ki jawani bhi ajab aafat-e-jaan hai

mumkin hai ki piri mein sukun pa sake warna

jab tak wo jawan hai gham-e-shauhar bhi jawan hai

mamta se hai majbur ki aulad ki KHatir

jiti hai magar jina ba-har-rang garan hai

KHun-gashtagi-e-dil ki dawa ho nahin sakti

kya KHak thame KHun ki jo aankhon se rawan hai

be-laus mohabbat ka sila daimi furqat

ai sahab-e-insaf ye insaf kahan hai

dil TuT to sakta hai magar juD nahin sakta

ab ye bhi ajab silsila shisha-garan hai

fariyaad kare bhi to kare kis se ki aaKHir

fariyaad ki qimat na yahan hai na wahan hai

ye malgaji chadar ye labaada shikan-alud

allah na kare tu kahin bewa to nahin hai

bhar aai hui aankhon mein Thahre hue aansu

ye nichi nazar wajib-e-sajda to nahin hai

is dard-e-mujassam ko bhi to ghur raha hai

shoala kahin dozaKH ka irada to nahin hai

manzil ka nishan kho gae gum-karda-rahi se

ye rasta firdaus ka jada to nahin hai