bhik shabnam ki

maiñ raushnī kā numā.inda raushnī kā safīr

har ek daur meñ hamla kiyā añdheroñ ne

kabhī salīb kī raunaq banā hai jism mirā

kabhī laboñ pe lagāyā hai maiñ ne zahr kā jaam

dahaktī aag meñ kundan banā badan merā

hirā ke ġhaar kī pākīzgī pukārtī hai

salām kartī hai mere junūñ ko vādī-e-nīl

maiñ raushnī kā safīr

na.ī sahar kā daraḳhshanda āftāb banā

añdhere dasht meñ pūnam kā chāñd ban ke khulā

mire lahū se hai qaa.em suhāg hastī kā

mirī kiran se hai tābinda kā.enāt kā ruup

naved-e-sub.h daraḳhshāñ adā-e-fasl-e-bahār

dhanak kī dilkashī ḳhushbū-e-gul shamīm-e-chaman

mire hī ḳhuun se hai ābrū-e-rang-e-hayāt

magar nasīb meñ mere hai zulmat-e-pur-haul

maiñ raushnī kā numā.inda raushnī kā safīr

ḳhud apne dard kī zulmat ke daam meñ huuñ asiir

mire vajūd kā patthar sulag rahā hai jise

maiñ apne ashk kī shabnam kī bhiik detā huuñ

main raushni ka numainda raushni ka safir

har ek daur mein hamla kiya andheron ne

kabhi salib ki raunaq bana hai jism mera

kabhi labon pe lagaya hai main ne zahr ka jam

dahakti aag mein kundan bana badan mera

hira ke ghaar ki pakizgi pukarti hai

salam karti hai mere junun ko wadi-e-nil

main raushni ka safir

nai sahar ka daraKHshanda aaftab bana

andhere dasht mein punam ka chand ban ke khula

mere lahu se hai qaem suhag hasti ka

meri kiran se hai tabinda kaenat ka rup

nawed-e-subh daraKHshan ada-e-fasl-e-bahaar

dhanak ki dilkashi KHushbu-e-gul shamim-e-chaman

mere hi KHun se hai aabru-e-rang-e-hayat

magar nasib mein mere hai zulmat-e-pur-haul

main raushni ka numainda raushni ka safir

KHud apne dard ki zulmat ke dam mein hun asir

mere wajud ka patthar sulag raha hai jise

main apne ashk ki shabnam ki bhik deta hun