bholi-bhaali chiDiya

ai pyārī pyārī chiḌiyā

sūrat mujhe dikhā jā

bholī sī terī sūrat

dil meñ basī hai mūrat

nannhī sī choñch terī

kaisī bhalī hai lagtī

ik raag tū sunā jā

ai bholī-bhālī chiḌiyā

shāḳhoñ pe baiThī baiThī

ānand se chahaktī

kis ko hai yaad kartī

dam kis kā tū hai bhartī

duniyā ke nek-o-bad se

kiine se aur hasad se

tujh ko nahīñ ḳhabar kyā

ai bholī-bhālī chiḌiyā

pattoñ pe chahchahānā

aur dil ko yuuñ lubhānā

uḌnā ye Daalī Daalī

kab lutf se hai ḳhālī

kyā paak zindagī hai

kyā shāñtī ḳhushī hai

bhātā hai raag terā

ai bholī-bhālī chiḌiyā

kyā mīThī rāgnī hai

kyā shakl mohnī hai

terī ye chuuñ chuuñ pyārī

aur phirnā kyārī kyārī

terā phudaknā har dam

aur bolnā gajar dam

tujh se hai ghar suhānā

ai bholī-bhālī chiḌiyā

vo sub.h kā jhamkaḌā

mil-jul ke aur vo gaanā

vo shaam kā baserā

dil ko bhalā hai lagtā

chhat meñ vo ghoñsla hai

vo bhī bahut bhalā hai

har Dhang terā pyārā

ai bholī-bhālī chiḌiyā

nādān bachche tū kyā

jānegā us kā kahnā

chiḌiyā jo boltī hai

aur motī roltī hai

maḳhlūq hai ḳhudā kī

hastī hai ye vafā kī

kartī hai zikr rab kā

ye bholī-bhālī chiḌiyā

ai pyari pyari chiDiya

surat mujhe dikha ja

bholi si teri surat

dil mein basi hai murat

nannhi si chonch teri

kaisi bhali hai lagti

ek rag tu suna ja

ai bholi-bhaali chiDiya

shaKHon pe baiThi baiThi

aanand se chahakti

kis ko hai yaad karti

dam kis ka tu hai bharti

duniya ke nek-o-bad se

kine se aur hasad se

tujh ko nahin KHabar kya

ai bholi-bhaali chiDiya

patton pe chahchahana

aur dil ko yun lubhana

uDna ye Dali Dali

kab lutf se hai KHali

kya pak zindagi hai

kya shanti KHushi hai

bhata hai rag tera

ai bholi-bhaali chiDiya

kya miThi ragni hai

kya shakl mohni hai

teri ye chun chun pyari

aur phirna kyari kyari

tera phudakna har dam

aur bolna gajar dam

tujh se hai ghar suhana

ai bholi-bhaali chiDiya

wo subh ka jhamkaDa

mil-jul ke aur wo gana

wo sham ka basera

dil ko bhala hai lagta

chhat mein wo ghonsla hai

wo bhi bahut bhala hai

har Dhang tera pyara

ai bholi-bhaali chiDiya

nadan bachche tu kya

jaanega us ka kahna

chiDiya jo bolti hai

aur moti rolti hai

maKHluq hai KHuda ki

hasti hai ye wafa ki

karti hai zikr rab ka

ye bholi-bhaali chiDiya