bhuke peT

ruktī sāñseñ haiñ aur siinā

maut ke paañv tale hai jiinā

oghaT ghaaT bhañvar ke chakkar

Dag-mag hai jīvan kā safīna

ġham aur aañsū aañsū aur ġham

ġham khānā aur aañsū piinā

barkhā-rut vīrānoñ kī hai

chāñdnī qabristānoñ kī hai

man meñ lahr kabhī uThtī thī

baat ye ab afsānoñ kī hai

jaise saa.e reñg rahe hoñ

hālat ye insānoñ kī hai

ham se ġhāfil taqdīreñ haiñ

be-dast-o-pā tadbīreñ haiñ

ḳhushk laboñ kī murda aaheñ

bhūke peT kī tafsīreñ haiñ

kaise kaheñ ham bhī jiite the

ab to be-jāñ tasvīreñ haiñ

jiite haiñ aur mar nahīñ sakte

bebas haiñ kuchh kar nahīñ sakte

phūloñ kī ḳhushbū aatī hai

dāman un se bhar nahīñ sakte

duniyā duniyā kahne vaale

duniyā apnī kar nahīñ sakte

sab kā pālanhār kidhar hai

duniyā us kā hī to hunar hai

bane khilaune TuuT rahe haiñ

uf ye gharauñdā zer-o-zabar hai

kuchh rote haiñ kuchh hañste haiñ

aur phir donoñ kā ye ghar hai

rukti sansen hain aur sina

maut ke panw tale hai jina

oghaT ghaT bhanwar ke chakkar

Dag-mag hai jiwan ka safina

gham aur aansu aansu aur gham

gham khana aur aansu pina

barkha-rut viranon ki hai

chandni qabristanon ki hai

man mein lahr kabhi uThti thi

baat ye ab afsanon ki hai

jaise sae reng rahe hon

haalat ye insanon ki hai

hum se ghafil taqdiren hain

be-dast-o-pa tadbiren hain

KHushk labon ki murda aahen

bhuke peT ki tafsiren hain

kaise kahen hum bhi jite the

ab to be-jaan taswiren hain

jite hain aur mar nahin sakte

bebas hain kuchh kar nahin sakte

phulon ki KHushbu aati hai

daman un se bhar nahin sakte

duniya duniya kahne wale

duniya apni kar nahin sakte

sab ka palanhaar kidhar hai

duniya us ka hi to hunar hai

bane khilaune TuT rahe hain

uf ye gharaunda zer-o-zabar hai

kuchh rote hain kuchh hanste hain

aur phir donon ka ye ghar hai