book fair

lafz-o-ma.anī kā ik silsila

tā-ba-hadd-e-nazar

niile piile hare kāsnī arġhavānī libādoñ meñ malbūs aurāq

chāroñ taraf

dāvat-e-dīd detī huī daa.eñ baa.eñ kitābeñ

ki ehsās ko gudgudātī huī

lafz-dar-lafz e.ajāz-e-nok-e-qalam

husn-e-tahrīr jaadū jagātā huā

husn-e-taḳhlīq be-jāñ meñ jaañ Dāltā

fikr kī saf.he saf.he meñ ḳhushbū basī

ḳhūbsūrat ḳhayālāt kī tāzgī

husn-e-alfāz-o-husn-e-ma.ānī ke sab mo'tarif

rang-o-bū kī fazā kah rahī hai magar

chaltī phirtī huī chand tahrīr-e-tāza

diloñ ko lubhātī nigāhoñ ko shādāb kartī huī

in kitāboñ se bāhar

haiñ vo harf-e-zebā

ki zebā.iyāñ ḳhatm jin par

haiñ vo harf-e-shīrīñ

jo ab tak kitāboñ ko hāsil nahīñ

lafz-o-mani ka ek silsila

ta-ba-hadd-e-nazar

nile pile hare kasni arghawani libaadon mein malbus auraq

chaaron taraf

dawat-e-did deti hui daen baen kitaben

ki ehsas ko gudgudati hui

lafz-dar-lafz eajaz-e-nok-e-qalam

husn-e-tahrir jadu jagata hua

husn-e-taKHliq be-jaan mein jaan Dalta

fikr ki safhe safhe mein KHushbu basi

KHubsurat KHayalat ki tazgi

husn-e-alfaz-o-husn-e-maani ke sab mo'tarif

rang-o-bu ki faza kah rahi hai magar

chalti phirti hui chand tahrir-e-taza

dilon ko lubhati nigahon ko shadab karti hui

in kitabon se bahar

hain wo harf-e-zeba

ki zebaiyan KHatm jin par

hain wo harf-e-shirin

jo ab tak kitabon ko hasil nahin