breaking news

tahayyur ḳhauf dahshat

barbariyyat aur anokhe zulm ko

mānūs lafzoñ kī qabā pahnā ke

jab bhī media se nashr karte haiñ

breaking news kahlātī hai

aur is news meñ koshish ye kī jaatī hai ki

vahshat-zada māhaul meñ video koī

aisī banā kar pesh kī jaa.e

ki jis ko dekh kar ham ko yaqīñ aa.e

jahāñ meñ ab añdhere hī añdhere haiñ

bahut nāyāb ab raushan savere haiñ

kahīñ jugnū nahīñ milte

kahīñ par gul nahīñ khilte

har ik sū chāk-dāmānī

kahīñ baḳhiye nahīñ silte

breaking news kī ik dauḌ jaarī hai

ki pahle kaun sā channel

diloñ meñ dard bhartā hai

lahū ko sard kartā hai

maiñ sab se pūchhtī huuñ

merī duniyā meñ koī aisī ḳhabar

jo aañkh meñ aañsū na ban paa.e

jo dil ko ḳhauf ke raste na le jaa.e

kisī insān kī nekī kisī bachche kī aisī muskurāhaT

jo farishtoñ jaisī lagtī hai

dayār-e-ishq kī tasḳhīr yā phir vo masarrat

jo bahut se āñsuoñ ke ba.ad miltī hai

taqaddus se bharā kirdār

sachchā.ī vafā īmān-dārī sabr hamdardī

breaking news āḳhir kyuuñ nahīñ bantī

tahayyur KHauf dahshat

barbariyyat aur anokhe zulm ko

manus lafzon ki qaba pahna ke

jab bhi media se nashr karte hain

breaking news kahlati hai

aur is news mein koshish ye ki jati hai ki

wahshat-zada mahaul mein wideo koi

aisi bana kar pesh ki jae

ki jis ko dekh kar hum ko yaqin aae

jahan mein ab andhere hi andhere hain

bahut nayab ab raushan sawere hain

kahin jugnu nahin milte

kahin par gul nahin khilte

har ek su chaak-damani

kahin baKHiye nahin silte

breaking news ki ek dauD jari hai

ki pahle kaun sa channel

dilon mein dard bharta hai

lahu ko sard karta hai

main sab se puchhti hun

meri duniya mein koi aisi KHabar

jo aankh mein aansu na ban pae

jo dil ko KHauf ke raste na le jae

kisi insan ki neki kisi bachche ki aisi muskurahaT

jo farishton jaisi lagti hai

dayar-e-ishq ki tasKHir ya phir wo masarrat

jo bahut se aansuon ke baad milti hai

taqaddus se bhara kirdar

sachchai wafa iman-dari sabr hamdardi

breaking news aaKHir kyun nahin banti