buDhiya

roz hī buḌhiyā uTh kar kyoñ kahtī hai

pyaas lagī hai

paanī Dālte Dālte mug se aa jaatī hai

gilās girāoge tum

haath tumhāre kaañp rahe haiñ

jaan jalā rakhī hai is ne

ḳharrāTe kyā maiñ letā huuñ

naak to is kī pharrātī hai

aadhī raat ko uTh kar kahtī hai ki pañkhā band karo naañ ThanD

lagtī hai

paañv maar ke ḳhud hī to chādar pheñkī thī

paañv palañg pe maar kar pair sujā rakhā hai

saarī raat dabātā huuñ

pain-killer khā khā ke bhī ab uub gayā huuñ

saarī umr jalāyā is ne

ek baras hone ko aayā

sīḌhī par phislī thī to sar phoḌ liyā thā

apne haath se aag ke uupar rakh kar aayā thā maiñ us ko

aur kahā thā tū chal maiñ bhī aatā huuñ

par jaa.e tab naañ

saarī raat mire bistar par karvaTeñ letī rahtī hai

roz hi buDhiya uTh kar kyon kahti hai

pyas lagi hai

pani Dalte Dalte mug se aa jati hai

gilas giraoge tum

hath tumhaare kanp rahe hain

jaan jala rakhi hai is ne

KHarraTe kya main leta hun

nak to is ki pharraati hai

aadhi raat ko uTh kar kahti hai ki pankha band karo nan ThanD

lagti hai

panw mar ke KHud hi to chadar phenki thi

panw palang pe mar kar pair suja rakha hai

sari raat dabaata hun

pain-killer kha kha ke bhi ab ub gaya hun

sari umr jalaya is ne

ek baras hone ko aaya

siDhi par phisli thi to sar phoD liya tha

apne hath se aag ke upar rakh kar aaya tha main us ko

aur kaha tha tu chal main bhi aata hun

par jae tab nan

sari raat mere bistar par karwaTen leti rahti hai