bus ke musafir

tīsrī duniyā ke ham baasī

bus ke musāfir

seat par baiThe

ūñghte sote

shīshe kī khiḌkī se bāhar

bhāgte manzar dekh rahe haiñ

kyā kuchh dekheñ

kahāñ rukeñ

aur kin rastoñ par ham jaa.eñ

faisla is kā

to chālak ke hāthoñ meñ hai

aur ye chālak

pahlī duniyā kā ik leader

behad chālū chaltā purza

sadiyoñ se ik farzī manzil

kā dhuñdlā sā ḳhvāb dikhā kar

aur tahaffuz kā jhūTā ehsās dilā kar

ḳhud ko sevak daas batā kar

stēring par mazbūtī se haath jamā kar

ham ko chāroñ samt ghumātā phirtā hai

ham haiñ itne bhole-bhāle

apnī āsā.ish kī ḳhātir

apnī āzādī kā saudā kar lete haiñ

tisri duniya ke hum basi

bus ke musafir

seat par baiThe

unghte sote

shishe ki khiDki se bahar

bhagte manzar dekh rahe hain

kya kuchh dekhen

kahan ruken

aur kin raston par hum jaen

faisla is ka

to chaalak ke hathon mein hai

aur ye chaalak

pahli duniya ka ek leader

behad chaalu chalta purza

sadiyon se ek farzi manzil

ka dhundla sa KHwab dikha kar

aur tahaffuz ka jhuTa ehsas dila kar

KHud ko sewak das bata kar

steering par mazbuti se hath jama kar

hum ko chaaron samt ghumata phirta hai

hum hain itne bhole-bhaale

apni aasaish ki KHatir

apni aazadi ka sauda kar lete hain