buDha waqt hamara istiqbaal karta hai

arsha-e-ḳhāk se, maiñ ne hāthoñ meñ miTTī bharī

aur havā meñ uchhālī

bahut duur tak ḳhaak uḌtī ga.ī

der tak maiñ ne be-ma.anī nazzāre ko kā.enātī havāloñ se maapā

kabhī tuul aur arz meñ us ko rakhā

ubhre papoToñ,

kabhī band āñkhoñ se dekhā!

vo sochā jo dekhā nahīñ jā sakā!

havā ḳhaak thī yā havā meñ thī ḳhāk...!

gard kī muTThiyoñ se havā chhan rahī thī

arsha-e-ḳhāk kī god... phir bhar rahī thī

āb-e-vaqt āsmāñ kī taraf baḌhne kī koshishoñ meñ

zamīñ ke pyāle meñ girtā gayā

koī āhista se būḌhā hotā gayā

sochte sochte

kapkapī sī mire hoñToñ ke naqra.ī dā.eroñ meñ utartī ga.ī

amar-bel kī tarah hāthoñ se ra.asha lipaTne lagā

rafta rafta... simaTne lage... arsha-e-ḳhāk par

muntashir gard, meñ aur havā

arsha-e-KHak se, main ne hathon mein miTTi bhari

aur hawa mein uchhaali

bahut dur tak KHak uDti gai

der tak main ne be-mani nazzare ko kaenati hawalon se mapa

kabhi tul aur arz mein us ko rakha

ubhre papoTon,

kabhi band aankhon se dekha!

wo socha jo dekha nahin ja saka!

hawa KHak thi ya hawa mein thi KHak!

gard ki muTThiyon se hawa chhan rahi thi

arsha-e-KHak ki god phir bhar rahi thi

aab-e-waqt aasman ki taraf baDhne ki koshishon mein

zamin ke pyale mein girta gaya

koi aahista se buDha hota gaya

sochte sochte

kapkapi si mere honTon ke naqrai daeron mein utarti gai

amar-bel ki tarah hathon se rasha lipaTne laga

rafta rafta simaTne lage arsha-e-KHak par

muntashir gard, mein aur hawa