buDhi qismat

yādoñ ke cup meñ chand dukhoñ aur

kisī ke jhūTe va.adoñ kī taklīfoñ

ko piine ke alāva

mere bas meñ kuchh bhī nahīñ

shāyad merā chehra

ab bāñjh-pan kā shikār ho chukā

hai jo laakh koshishoñ ke baad bhī

muskurāhaT ko janm dene meñ nākām hai

merī qismat bhī mujhe masnūī

ḳhushiyoñ se navāztī rahtī hai

jo mujhe sukūn dilāne

kī ek nākām koshish hai

gaañv meñ maujūd vo būḌhā jo purānī

jangoñ ke qisse sunā kar

vaqt guzārne meñ merī madad kartā thā

vo bhī vafāt pā chukā hai

maiñ chāhtā huuñ ke merī qismat

hāmila ho taaki vo ek

haqīqī aur ḳhūbsūrat ḳhushī

ko janm de sake

magar shāyad ye qismat

ab būḌhī ho chukī hai shāyad kisī

ġham ne use itnā būḌhā kar diyā hai

ki ye ab chaah kar bhī kisī

ḳhushī ko janm nahīñ de saktī

vo titlī jo har shaam baaġh meñ kisī se

milne aatī thī aaj maiñ ne der tak

us kā intizār kiyā lekin vo nahīñ aa.ī

maiñ ne baaġh meñ saarā vaqt

ḳhud ko diyā ḳhud se bāteñ kiiñ ḳhud ko

muskurāhaT kā ek masnūī tohfa diyā

ḳhud ke saath baiTh kar cigarette pī

baaġh se vāpsī par maiñ ne train ko dekhā

jo tezī se bhaag rahī thī

shāyad use kisī se milne jaanā thā

yā koī us ke intizār meñ baiThā thā

kahīñ us train kā us titlī kā

aur būḌhī qismat kā ta'alluq

mohabbat se to nahīñ

yaadon ke cup mein chand dukhon aur

kisi ke jhuTe wadon ki taklifon

ko pine ke alawa

mere bas mein kuchh bhi nahin

shayad mera chehra

ab banjh-pan ka shikar ho chuka

hai jo lakh koshishon ke baad bhi

muskurahaT ko janm dene mein nakaam hai

meri qismat bhi mujhe masnui

KHushiyon se nawazti rahti hai

jo mujhe sukun dilane

ki ek nakaam koshish hai

ganw mein maujud wo buDha jo purani

jangon ke qisse suna kar

waqt guzarne mein meri madad karta tha

wo bhi wafat pa chuka hai

main chahta hun ke meri qismat

hamila ho taki wo ek

haqiqi aur KHubsurat KHushi

ko janm de sake

magar shayad ye qismat

ab buDhi ho chuki hai shayad kisi

gham ne use itna buDha kar diya hai

ki ye ab chah kar bhi kisi

KHushi ko janm nahin de sakti

wo titli jo har sham bagh mein kisi se

milne aati thi aaj main ne der tak

us ka intizar kiya lekin wo nahin aai

main ne bagh mein sara waqt

KHud ko diya KHud se baaten kin KHud ko

muskurahaT ka ek masnui tohfa diya

KHud ke sath baiTh kar cigarette pi

bagh se wapsi par main ne train ko dekha

jo tezi se bhag rahi thi

shayad use kisi se milne jaana tha

ya koi us ke intizar mein baiTha tha

kahin us train ka us titli ka

aur buDhi qismat ka ta'alluq

mohabbat se to nahin