chand hum donon se mushabah hai

guzishta raat puure chāñd kī shab thī

pas-e-dahlīz tum thiiñ

aur maiñ nā-ḳhvāsta qadmoñ se bāhar kī taraf jaate hue āñkhoñ hī āñkhoñ meñ

tumheñ ḳhud meñ samotā jā rahā thā

bhalā kab tak ye manzar saath detā!

'ḳhudā-hāfiz' ke lamhe ba.ad darvāza muqaffal ho chukā thā

aur āñkhoñ kī rasā.ī se tumhārā jagmagātā husn ojhal ho chukā thā

(magar maiñ band darvāze kī jānib dekhnā bhī ishq ke ādāb kā hissa samajhtā huuñ)

udhar kamre kī chhat ke ain-ūpar, āsmāñ par

chaudhvīñ kā chāñd raushan thā

tumhārī hī shabāhat thī

mujhe to yuuñ lagā jaise falak par bhī tumhārā husn hī mahtāb ban kar jagmagātā hai

magar phir yuuñ lagā jaise ki ye mahtāb ik chehra nahīñ ik aañkh hai jis meñ

kisī ko dekhte rahne kī ḳhvāhish jhilmilātī hai

to ye jaanā ki us kamre kī chhat ke ain-ūpar, āsmāñ par

maiñ ne apnī aañkh rakh dī

guzishta raat pure chand ki shab thi

pas-e-dahliz tum thin

aur main na-KHwasta qadmon se bahar ki taraf jate hue aankhon hi aankhon mein

tumhein KHud mein samota ja raha tha

bhala kab tak ye manzar sath deta!

'KHuda-hafiz' ke lamhe baad darwaza muqaffal ho chuka tha

aur aankhon ki rasai se tumhaara jagmagata husn ojhal ho chuka tha

(magar main band darwaze ki jaanib dekhna bhi ishq ke aadab ka hissa samajhta hun)

udhar kamre ki chhat ke ain-upar, aasman par

chaudhwin ka chand raushan tha

tumhaari hi shabahat thi

mujhe to yun laga jaise falak par bhi tumhaara husn hi mahtab ban kar jagmagata hai

magar phir yun laga jaise ki ye mahtab ek chehra nahin ek aankh hai jis mein

kisi ko dekhte rahne ki KHwahish jhilmilati hai

to ye jaana ki us kamre ki chhat ke ain-upar, aasman par

main ne apni aankh rakh di