chaaragar

ab kise chārāgar-e-dard kaheñ

dard hotā hai har ik aan sivā

dard pahle bhī to hotā thā bahut

saḳht aur aisā ki jaañ kā dushman

maut aane ke yaqīñ kā hamdam

zinda rahne ke gumāñ kā dushman

lekin us dard kī kuchh aur thī baat

dard uThtā bhī hai dil meñ ki nahīñ uThtā hai

hone paatā hī na thā is kā kisī pal ehsās

hone paatā na thā ik aan ye ojhal ehsās

ki jo begāne hoñ dukh ko na samajhne vaale

un se dukh-dard na pā.eñge to kyā pā.eñge

lekin ab koī bhī begāna nahīñ

aur is baat kā dukh hotā hai har aan bahut

aur dil hotā hai rah rah ke pareshān bahut

ki nazar aate haiñ yuuñ ziist ke sāmān bahut

aur phir ziist ke sāmān yakāyak

dekhte hī dekhte ho jaate haiñ patthar kyūñkar

yuuñ nazar aate to haiñ ziist ke sāmān bahut

phir bhī jiine se hai bezār har ik jaan bahut

aur ab koī bhī begāna nahīñ

dard hotā hai har ik aan sivā

ab kise chārāgar-e-dard kaheñ

ab kise chaaragar-e-dard kahen

dard hota hai har ek aan siwa

dard pahle bhi to hota tha bahut

saKHt aur aisa ki jaan ka dushman

maut aane ke yaqin ka hamdam

zinda rahne ke guman ka dushman

lekin us dard ki kuchh aur thi baat

dard uThta bhi hai dil mein ki nahin uThta hai

hone pata hi na tha is ka kisi pal ehsas

hone pata na tha ek aan ye ojhal ehsas

ki jo begane hon dukh ko na samajhne wale

un se dukh-dard na paenge to kya paenge

lekin ab koi bhi begana nahin

aur is baat ka dukh hota hai har aan bahut

aur dil hota hai rah rah ke pareshan bahut

ki nazar aate hain yun zist ke saman bahut

aur phir zist ke saman yakayak

dekhte hi dekhte ho jate hain patthar kyunkar

yun nazar aate to hain zist ke saman bahut

phir bhi jine se hai bezar har ek jaan bahut

aur ab koi bhi begana nahin

dard hota hai har ek aan siwa

ab kise chaaragar-e-dard kahen