chamgadaD

parinda to nahīñ huuñ

phir bhī shahpar kā azaab

apne tavāfoñ meñ sameTe

bun rahā huuñ hindisa be-ḳhvāb rātoñ kā

ki nā-bīnā jahānoñ meñ

basārat ko samā.at meñ piro kar jāgtā huuñ maiñ

badan ko dā.eroñ kī zad pe kho kar jāgtā huuñ maiñ

mire chehre meñ dozaḳh ke sharāroñ kā baserā hai

mirī āvāz ne apnī umūdī guuñj phailā kar

tumhāre gumbad o mehrāb kī tanhā.ī toḌī hai

parinda to nahīñ huuñ

phir bhī lā-yānī paroñ ko taultā rahtā huuñ

ik be-nām gardish meñ

bikhartī shaam kī parchhā.īñ se ījād hai merī

falak buniyād hai merī

izāfī āsmānoñ meñ muqayyad paañv haiñ mere

mire qadmoñ meñ jannat hai

parinda to nahin hun

phir bhi shahpar ka azab

apne tawafon mein sameTe

bun raha hun hindisa be-KHwab raaton ka

ki na-bina jahanon mein

basarat ko samaat mein piro kar jagta hun main

badan ko daeron ki zad pe kho kar jagta hun main

mere chehre mein dozaKH ke shararon ka basera hai

meri aawaz ne apni umudi gunj phaila kar

tumhaare gumbad o mehrab ki tanhai toDi hai

parinda to nahin hun

phir bhi la-yani paron ko taulta rahta hun

ek be-nam gardish mein

bikharti sham ki parchhain se ijad hai meri

falak buniyaad hai meri

izafi aasmanon mein muqayyad panw hain mere

mere qadmon mein jannat hai