chauraha

mire siine ke jangal se

ka.ī raste nikalte haiñ

yahāñ se ek pagDanDī ḳhat-e-tārīk par chaltī

shu’ūrī lā-shu'ūrī sarhadoñ ke paar jaatī hai

kabhī us samt mat jaanā

vahāñ par azhdahe rahte haiñ maazī ke

nigal lete haiñ aane vaale raushan din

yahīñ se ek chamkīlī chakā-chauñdī saḌak duniyā ko jaatī hai

havas range ishāroñ se bulātī hai

udhar ko mat chalī jaanā

vahāñ sab bheḌiye baiThe haiñ

khā jaate haiñ ḳhvāboñ aur ummīdoñ ke nāzuk tan

yahāñ se ūñchā nīchā rāsta muḌ kar

hisābī soch kī jānib nikaltā hai

vahāñ sūd-o-ziyāñ ke anginat bichchhū haiñ

Das lete haiñ jazboñ ko

mire siine ke jangal se bahut raste nikalte haiñ

ye sīdhā saaf sachchā rāsta

narmī se mere dil kī vaadī meñ phisaltā hai

suhūlat se chalī aao

yahāñ phūloñ ke taḳhtoñ ke sivā kuchh bhī nahīñ rakkhā

mere sine ke jangal se

kai raste nikalte hain

yahan se ek pagDanDi KHat-e-tarik par chalti

shu’uri la-shu'uri sarhadon ke par jati hai

kabhi us samt mat jaana

wahan par azhdahe rahte hain mazi ke

nigal lete hain aane wale raushan din

yahin se ek chamkili chaka-chaundi saDak duniya ko jati hai

hawas range ishaaron se bulati hai

udhar ko mat chali jaana

wahan sab bheDiye baiThe hain

kha jate hain KHwabon aur ummidon ke nazuk tan

yahan se uncha nicha rasta muD kar

hisabi soch ki jaanib nikalta hai

wahan sud-o-ziyan ke anginat bichchhu hain

Das lete hain jazbon ko

mere sine ke jangal se bahut raste nikalte hain

ye sidha saf sachcha rasta

narmi se mere dil ki wadi mein phisalta hai

suhulat se chali aao

yahan phulon ke taKHton ke siwa kuchh bhi nahin rakkha