chhanw se dhup tak

maiñ jahāñ bhī gayā maiñ jidhar bhī gayā

chhāñv hī chhāñv thā zindagī kā safar

ġham kī zarra barābar kahīñ dhuup bhī

merī rāhoñ meñ haa.il huī hī nahīñ

is khule āsmāñ ke tale hī kabhī

dast-e-shafqat tirā mujh ko chhat sā lagā

aur terī taraf dekhte dekhte

kā’ba-o-qibla maiñ ne bhī dekhe bahut

ḳhauf-o-dahshat pareshānī aur ranj-o-ġham

tere hote hue mujh se the ajnabī

aur duniyā ke mausam ke uḌte sharar

mujh ko ThanDī havāoñ ke jhoñke lage

koī ḳhauf-e-ḳhizāñ dil pe taarī na thā

dil kā gulshan bahāroñ se ābād thā

aaj tere na hone ke ehsās se

chāñd TuuTā huā ik khilaunā lagā

mere dāman ke raushan sitāre sabhī

tīrgī ke achānak havāle hue

gulshan-e-zindagī bhī sulagne lagā

ḳhaak hī ḳhaak har samt uḌne lagī

sub.h bhī turbat-e-shām meñ dab ga.ī

apne andāz se neza-e-raushnī

merī shab ko bhī majrūh karne lagā

mere misre bhī mujh se ḳhafā ho ga.e

merā shā'ir bhī ḳhāmosh rahne lagā

aaj ruk ruk ke maiñ sochtā huuñ yahī

maiñ vahī huuñ safar bhī vahī hai mirā

manzileñ bhī vahī rāste bhī vahī

duur tak mere chalne kī zid bhī vahī

haañ magar aise hālāt ke darmiyāñ

chhāñv se dhuup tak kā mirā ye safar

dast-e-shafqat se ab tere mahrūm hai

main jahan bhi gaya main jidhar bhi gaya

chhanw hi chhanw tha zindagi ka safar

gham ki zarra barabar kahin dhup bhi

meri rahon mein hail hui hi nahin

is khule aasman ke tale hi kabhi

dast-e-shafqat tera mujh ko chhat sa laga

aur teri taraf dekhte dekhte

ka’ba-o-qibla main ne bhi dekhe bahut

KHauf-o-dahshat pareshani aur ranj-o-gham

tere hote hue mujh se the ajnabi

aur duniya ke mausam ke uDte sharar

mujh ko ThanDi hawaon ke jhonke lage

koi KHauf-e-KHizan dil pe tari na tha

dil ka gulshan bahaaron se aabaad tha

aaj tere na hone ke ehsas se

chand TuTa hua ek khilauna laga

mere daman ke raushan sitare sabhi

tirgi ke achanak hawale hue

gulshan-e-zindagi bhi sulagne laga

KHak hi KHak har samt uDne lagi

subh bhi turbat-e-sham mein dab gai

apne andaz se neza-e-raushni

meri shab ko bhi majruh karne laga

mere misre bhi mujh se KHafa ho gae

mera sha'ir bhi KHamosh rahne laga

aaj ruk ruk ke main sochta hun yahi

main wahi hun safar bhi wahi hai mera

manzilen bhi wahi raste bhi wahi

dur tak mere chalne ki zid bhi wahi

han magar aise haalat ke darmiyan

chhanw se dhup tak ka mera ye safar

dast-e-shafqat se ab tere mahrum hai