chuTki bhar raushni

ye honā thā ye honā thā

ki maiñ ne ik ajab

asrār ke andar

chale jaane kī ḳhvāhish kī

jahāñ ḳhasta chaTāneñ jā-ba-jā bikhrī paḌī thiiñ

shajar pathrā ga.e the

kalas mīnār gumbad bhar chuke the

jahāñ ik dhund kā be-ant

lambā ġhaar thā

jis meñ nahīñ kī bādshāhat thī

maiñ khiñchtā jā rahā thā ġhaar kī jānib

utartā jā rahā thā ik ajab asrār ke andar

jahāñ ik par thā ThanDī raushnī kā

jo hone kī anokhī dāstāñ

andhe ḳhalā kī lauh par tahrīr kartā jā rahā thā

mujhe asrār ke haale ke andar

yuuñ chale jaane kī jur.at kyuuñ huī

maiñ kis liye Thahrā rahā

hairān shashdar be-dhaḌak

vāpas chale jaane kā

maiñ ne kyuuñ na sochā us ghaḌī

aur ab ye haal hai merā

ki maiñ ik par kaTe taa.ir kī sūrat

shifā-ḳhāne kī mamtā se bharī jholī ke andar

sar-nigūñ huuñ

magar maiñ ek chuTkī raushnī to le hī aayā huuñ

ye hona tha ye hona tha

ki main ne ek ajab

asrar ke andar

chale jaane ki KHwahish ki

jahan KHasta chaTanen ja-ba-ja bikhri paDi thin

shajar pathra gae the

kalas minar gumbad bhar chuke the

jahan ek dhund ka be-ant

lamba ghaar tha

jis mein nahin ki baadshahat thi

main khinchta ja raha tha ghaar ki jaanib

utarta ja raha tha ek ajab asrar ke andar

jahan ek par tha ThanDi raushni ka

jo hone ki anokhi dastan

andhe KHala ki lauh par tahrir karta ja raha tha

mujhe asrar ke haale ke andar

yun chale jaane ki jurat kyun hui

main kis liye Thahra raha

hairan shashdar be-dhaDak

wapas chale jaane ka

main ne kyun na socha us ghaDi

aur ab ye haal hai mera

ki main ek par kaTe tair ki surat

shifa-KHane ki mamta se bhari jholi ke andar

sar-nigun hun

magar main ek chuTki raushni to le hi aaya hun