Cleopatra

shaam ke dāman meñ pechāñ nīm-afrañgī hasīñ

nuqra.ī pāroñ meñ ik sone kī laag

rah guzar meñ yā ḳhirāmāñ sard aag

yā kisī mutrib kī le ik tishna takmīl raag

ek bahr-e-be-karāñ kī jhilmilātī sat.h par

zau-fagan afsāna-hā-e-rañg-o-nūr

niile niile do kañval maujoñ se chuur

bahte bahte jo nikal jaa.eñ kahīñ sāhil se duur

chāñd sī peshāniyoñ par zarfishāñ lahroñ kā jaal

ahmarīñ uḌtā huā rañg-e-sharāb

jam ga.ī haiñ ash.a-e-sad-āftāb

gardanoñ ke pech-o-ḳham meñ ghul gayā hai māhtāb

ishrat-e-parvez meñ kyā nāla-e-hā-e-tez-tez

uḌ gayā din kī javānī kā ḳhumār

shaam ke chehre pe lauT aayā nikhār

ho chuke haiñ ho rahe haiñ aur dāman dāġh-dār

us kā zarrīñ taḳht sīmīñ jism hai āñkhoñ se duur

jām-e-zahr-ālūd se uThte haiñ jhaag

chauñk kar añgḌā.iyāñ lete haiñ naag

jaag 'antoni' mohabbat so rahī hai jaag jaag

sham ke daman mein pechan nim-afrangi hasin

nuqrai paron mein ek sone ki lag

rah guzar mein ya KHiraman sard aag

ya kisi mutrib ki le ek tishna takmil rag

ek bahr-e-be-karan ki jhilmilati sath par

zau-fagan afsana-ha-e-rang-o-nur

nile nile do kanwal maujon se chur

bahte bahte jo nikal jaen kahin sahil se dur

chand si peshaniyon par zarfishan lahron ka jal

ahmarin uDta hua rang-e-sharab

jam gai hain asha-e-sad-aftab

gardanon ke pech-o-KHam mein ghul gaya hai mahtab

ishrat-e-parwez mein kya nala-e-ha-e-tez-tez

uD gaya din ki jawani ka KHumar

sham ke chehre pe lauT aaya nikhaar

ho chuke hain ho rahe hain aur daman dagh-dar

us ka zarrin taKHt simin jism hai aankhon se dur

jam-e-zahr-alud se uThte hain jhag

chaunk kar angDaiyan lete hain nag

jag 'antoni' mohabbat so rahi hai jag jag