code blue

1

raat ke pichhle pahar

shor uThā

tabl bajā

aur naqqāre pe ik choT paḌī

dil-e-betāb pe phir fauj-kashī hotī thī

ghanTiyāñ bajne lagīñ

aur shifā-ḳhāne kī rahdārī tak

ġhalġhala uThne lagā

dard-e-dil nauha-e-anfās banā

ek lamhe ke liye

gardish-e-shām-o-sahar ḳhatm huī

dhaḌkanoñ meñ jo tavāzun thā vo be-rabt huā

hosh-o-idrāk kī sarhad se pare

dil-e-āshufta kī shiryānoñ meñ

sīna-e-zīst ke tārīk nihāñ-ḳhānoñ meñ

ek dariyā-e-ravāñ ḳhuun kā

sar mārtā thā

jaise chaTTān koī sāmne rasta roke

ek Thokar kī thakan jhel na paa.e koī

jāñ-kanī apne pasīne meñ sharābor khaḌī hāñptī thī

zindagī kāñptī thī

aur maidān meñ ghamsān kā ran paḌtā thā

2

raat ke pichhle pahar

niiñd ke baaġh meñ

jab aañkh khulī

shor barpā thā ki shab-ḳhūn paḌā

chāragaro

blue code

shahr-e-jāñ tere makīnoñ ko

tabīboñ ko

ab ārām kahāñ

ḳhvāb-e-āsūda jo thā

raat kī tez-nigāhī meñ uḌā jaatā hai

aur āñkhoñ se phir ik baar thakan poñchhnī paḌ jaatī hai

hausla phir se qadam bhartā hai

aur munādī kī sadā suntā hai

ik munādī ki musalsal hai yahāñ

dauḌiye

der na ho jaa.e kahīñ

apne bīmār kī ab jald ḳhabar le liije

1

raat ke pichhle pahar

shor uTha

tabl baja

aur naqqare pe ek choT paDi

dil-e-betab pe phir fauj-kashi hoti thi

ghanTiyan bajne lagin

aur shifa-KHane ki rahdari tak

ghalghala uThne laga

dard-e-dil nauha-e-anfas bana

ek lamhe ke liye

gardish-e-sham-o-sahar KHatm hui

dhaDkanon mein jo tawazun tha wo be-rabt hua

hosh-o-idrak ki sarhad se pare

dil-e-ashufta ki shiryanon mein

sina-e-zist ke tarik nihan-KHanon mein

ek dariya-e-rawan KHun ka

sar marta tha

jaise chaTTan koi samne rasta roke

ek Thokar ki thakan jhel na pae koi

jaan-kani apne pasine mein sharabor khaDi hanpti thi

zindagi kanpti thi

aur maidan mein ghamsan ka ran paDta tha

2

raat ke pichhle pahar

nind ke bagh mein

jab aankh khuli

shor barpa tha ki shab-KHun paDa

chaaragaro

blue code

shahr-e-jaan tere makinon ko

tabibon ko

ab aaram kahan

KHwab-e-asuda jo tha

raat ki tez-nigahi mein uDa jata hai

aur aankhon se phir ek bar thakan ponchhni paD jati hai

hausla phir se qadam bharta hai

aur munadi ki sada sunta hai

ek munadi ki musalsal hai yahan

dauDiye

der na ho jae kahin

apne bimar ki ab jald KHabar le lije