daera

jab mahakte haiñ tasavvur meñ tire lab ke gulāb

jaane kyoñ dīda-e-namnāk chhalak jaatā hai

chuum letā hai agar rū-e-tamanna ehsās

har taraf dard kā sho.ala sā dahak jaatā hai

apne majbūr tasavvur kā alamnāk ma.aal

dekh kar apne hī hālāt se sharmātā huuñ

dast-e-ummīd baḌhātā hai agar koī savāl

aks-e-tanhā.ī se āzurda sā ho jaatā huuñ

raat gahrī hai nigāhoñ meñ ujālā bhī nahīñ

terī jānib se kisī shauq kā naġhma na milā

soch vīrāñ hai koī dekhne vaalā bhī nahīñ

dīda-e-yās meñ raqsāñ koī saaya na milā

ye muqaddar meñ likhā hai to chalo sabr kareñ

apne hī ashkoñ se paimāna-e-imroz bhareñ

jab mahakte hain tasawwur mein tere lab ke gulab

jaane kyon dida-e-namnak chhalak jata hai

chum leta hai agar ru-e-tamanna ehsas

har taraf dard ka shoala sa dahak jata hai

apne majbur tasawwur ka alamnak maal

dekh kar apne hi haalat se sharmata hun

dast-e-ummid baDhata hai agar koi sawal

aks-e-tanhai se aazurda sa ho jata hun

raat gahri hai nigahon mein ujala bhi nahin

teri jaanib se kisi shauq ka naghma na mila

soch viran hai koi dekhne wala bhi nahin

dida-e-yas mein raqsan koi saya na mila

ye muqaddar mein likha hai to chalo sabr karen

apne hi ashkon se paimana-e-imroz bharen