daimi sukh

mohabbat dā.imī sukh hai

ki jis ko maut kī ghaḌiyāñ

kabhī kam kar nahīñ saktīñ

ye mausam ik daf.a aa.e

to phir aa kar Thahar jaa.e

hasīñ shādāb sī kaliyāñ

nigāhoñ meñ samā jaa.eñ

to phir ye mar nahīñ saktīñ

ḳhayāloñ kī ravānī meñ

ki jaise bahte paanī meñ

kañval khil jaa.eñ ḳhvāboñ ke

to qudarat muskurātī hai

ishāra kar ke tāroñ se

chhalakte ābshāroñ se

madhur sargoshiyāñ kar ke

hameñ rasta dikhātī hai

ye rasta kis qadar hairān-kun manzil dikhātā hai

isī raste pe insāñ ḳhud ko pahlī baar paatā hai

mohabbat ko sazā kahne se pahle soch kar rakhnā

ki jo is se bichhaḌ jaa.e use manzil nahīñ miltī

bikhar jaa.eñ jo ban kar ḳhaak phir mahfil nahīñ miltī

mohabbat dā.imī sukh hai

ye sukh maiñ chāhtī huuñ terī āñkhoñ meñ nazar aa.e

ki tū is kā.enāt-e-ḳhvāb kā hamrāz ban jaa.e

mohabbat dā.imī sukh hai

mohabbat daimi sukh hai

ki jis ko maut ki ghaDiyan

kabhi kam kar nahin saktin

ye mausam ek dafa aae

to phir aa kar Thahar jae

hasin shadab si kaliyan

nigahon mein sama jaen

to phir ye mar nahin saktin

KHayalon ki rawani mein

ki jaise bahte pani mein

kanwal khil jaen KHwabon ke

to qudarat muskuraati hai

ishaara kar ke taron se

chhalakte aabshaaron se

madhur sargoshiyan kar ke

hamein rasta dikhati hai

ye rasta kis qadar hairan-kun manzil dikhata hai

isi raste pe insan KHud ko pahli bar pata hai

mohabbat ko saza kahne se pahle soch kar rakhna

ki jo is se bichhaD jae use manzil nahin milti

bikhar jaen jo ban kar KHak phir mahfil nahin milti

mohabbat daimi sukh hai

ye sukh main chahti hun teri aankhon mein nazar aae

ki tu is kaenat-e-KHwab ka hamraaz ban jae

mohabbat daimi sukh hai