dastan mazdur

suno gar sun sako tum dāstān-e-ḳhūñ-chakāñ merī

rulā degī magar aañsū lahū ke dāstāñ merī

na sun merī zabāñ se tazkira merī tabāhī kā

zabān-e-hāl se kah deñgī sab barbādiyāñ merī

taḌap kar bhuuk se aksar mire farzand marte haiñ

barahna-tan nazar ā.eñgī tujh ko beTiyāñ merī

phaTe kapḌoñ meñ jab malbūs biivī ko maiñ paatā huuñ

to bañdh jaatī haiñ aksar rote rote hichkiyāñ merī

mirī mehnat ke shāhid haiñ ye chhāle mere hāthoñ ke

mirī ġhurbat kā maz.har hai ye jān-e-nīm-jāñ merī

amīroñ kī na pūchho tum agar kuchh bas chale un kā

to pī jaa.eñ lahū merā chabā leñ haDDiyāñ merī

agar kuchh rahm kar sakte nahīñ haiñ merī hālat par

'alī' itnā kareñ ki na uḌā.eñ phabtiyāñ merī

suno gar sun sako tum dastan-e-KHun-chakan meri

rula degi magar aansu lahu ke dastan meri

na sun meri zaban se tazkira meri tabahi ka

zaban-e-haal se kah dengi sab barbaadiyan meri

taDap kar bhuk se aksar mere farzand marte hain

barahna-tan nazar aaengi tujh ko beTiyan meri

phaTe kapDon mein jab malbus biwi ko main pata hun

to bandh jati hain aksar rote rote hichkiyan meri

meri mehnat ke shahid hain ye chhaale mere hathon ke

meri ghurbat ka mazhar hai ye jaan-e-nim-jaan meri

amiron ki na puchho tum agar kuchh bas chale un ka

to pi jaen lahu mera chaba len haDDiyan meri

agar kuchh rahm kar sakte nahin hain meri haalat par

'ali' itna karen ki na uDaen phabtiyan meri