dawat-e-nazar

maiñ hī maiñ huuñ koī hushyār kahe jaatā hai

vo hī vo haiñ koī sarshār kahe jaatā hai

hama-ūst us kī ḳhudī ke liye markaz ai dost

us kā nādān anā bhī hai matā-e-hama-ūst

hosh-afzā hai mujhe ġhalġhala-e-hushyārī

kaash samjhe use tū bhī jaras-e-bedārī

inhisār-e-mann-o-tū Thiik nahīñ sab samjheñ

vaqt hai ḳhud ko samajhne kā yahī ab samjheñ

ḳhud-shanāsī se hai ummīd ki ban jā.egā kaam

varna is hāl-e-zabūñ kā hai tabāhī anjām

na basārat na basīrat na azīmat ham meñ

kaam karne kī nahīñ naam ko himmat ham meñ

ik ḳhudī thī so kiyā us ko bhī ġhaflat ke sipurd

zindagī kī huī ye lahar bhī yuuñ dariyā burd

is taraf dekh farīsān-e-arūpā kī numūd

aaj bil-fe.al jo sābit hai vo un kā hai vajūd

rāz-e-taqdīr khulā un ke amal se un par

apne dar pai hai faqat be-amalī kā chakkar

husn-kārī kā mazāq un se huā ā.īna

na.ī duniyā kā ye manzar hai nayā ā.īna

aisī vahdat pe na ho kis liye kasrat shaidā

ek manzil se haiñ haftā-o-manāzil paidā

un kī duniyā hai na.ī apnī purānī duniyā

ban ga.ī apne liye raam kahānī duniyā

aur bātoñ meñ to kyā ḳhaak milegī jiddat

jab zabāñ meñ bhī gavārā nahīñ koī jiddat

chashm-ba-rāh nazar aate haiñ vo naqd-e-nigār

jin kī fitrat ko upaj se nahīñ bilkul sarokār

na.ī tarkīb agar un ko kahīñ mil jaa.e

barham itne hoñ ki pāmāl zamīñ hil jaa.e

phir ye haiñ aur adab-soz mudārāteñ haiñ

kyā zamāne meñ panapne kī yahī bāteñ haiñ

main hi main hun koi hushyar kahe jata hai

wo hi wo hain koi sarshaar kahe jata hai

hama-ust us ki KHudi ke liye markaz ai dost

us ka nadan ana bhi hai mata-e-hama-ust

hosh-afza hai mujhe ghalghala-e-hushyari

kash samjhe use tu bhi jaras-e-bedari

inhisar-e-mann-o-tu Thik nahin sab samjhen

waqt hai KHud ko samajhne ka yahi ab samjhen

KHud-shanasi se hai ummid ki ban jaega kaam

warna is haal-e-zabun ka hai tabahi anjam

na basarat na basirat na azimat hum mein

kaam karne ki nahin nam ko himmat hum mein

ek KHudi thi so kiya us ko bhi ghaflat ke sipurd

zindagi ki hui ye lahar bhi yun dariya burd

is taraf dekh farisan-e-arupa ki numud

aaj bil-feal jo sabit hai wo un ka hai wajud

raaz-e-taqdir khula un ke amal se un par

apne dar pai hai faqat be-amali ka chakkar

husn-kari ka mazaq un se hua aaina

nai duniya ka ye manzar hai naya aaina

aisi wahdat pe na ho kis liye kasrat shaida

ek manzil se hain hafta-o-manazil paida

un ki duniya hai nai apni purani duniya

ban gai apne liye ram kahani duniya

aur baaton mein to kya KHak milegi jiddat

jab zaban mein bhi gawara nahin koi jiddat

chashm-ba-rah nazar aate hain wo naqd-e-nigar

jin ki fitrat ko upaj se nahin bilkul sarokar

nai tarkib agar un ko kahin mil jae

barham itne hon ki pamal zamin hil jae

phir ye hain aur adab-soz mudaraaten hain

kya zamane mein panapne ki yahi baaten hain