daraKHton par koi patta nahin tha

daraḳhtoñ par koī pattā nahīñ thā

guzarte rāste ḳhāmosh the

uḌte parinde raat kā aaseb lagte the

jahāñ tak bhī nazar jaatī thī

un logoñ kī qabreñ thiiñ jo paidā hī na ho paa.e

sitāre the magar vo āsmānoñ par huvaidā hī na ho paa.e

ḳhabar ye thī is miTTī meñ sabza lahlahā.e gā

yahāñ vo vaqt aa.egā ki har-sū rañg hoñge phuul hoñge raushnī hogī

magar ye kaun batlā.e

ki kaise is añdhere meñ kamī hogī

jo sadiyoñ se hamārī aañkh kī putlī kā hissa hai

sunā hai vaqt aage kī taraf jaatā hai

lekin ham hazāroñ saal se us ek nuqte par khaḌe haiñ jis ke nīche kuchh nahīñ hai jis ke uupar kuchh nahīñ hai

tum ne to chauthī jihat bhī DhūñD lī

aur ham pahlī jihat kī justujū meñ ḳhaak ho kar rah ga.e

daraKHton par koi patta nahin tha

guzarte raste KHamosh the

uDte parinde raat ka aaseb lagte the

jahan tak bhi nazar jati thi

un logon ki qabren thin jo paida hi na ho pae

sitare the magar wo aasmanon par huwaida hi na ho pae

KHabar ye thi is miTTi mein sabza lahlahae ga

yahan wo waqt aaega ki har-su rang honge phul honge raushni hogi

magar ye kaun batlae

ki kaise is andhere mein kami hogi

jo sadiyon se hamari aankh ki putli ka hissa hai

suna hai waqt aage ki taraf jata hai

lekin hum hazaron sal se us ek nuqte par khaDe hain jis ke niche kuchh nahin hai jis ke upar kuchh nahin hai

tum ne to chauthi jihat bhi DhunD li

aur hum pahli jihat ki justuju mein KHak ho kar rah gae