dard uruj par aa jae to

aa rī mail kuchailī

bhūkī nañgī duniyā

maiñ ne ik din terī qīmat

ik kam besh rūpa.e rakkhī thī

apne kahe par aaj bahut sharminda huuñ

aa maiñ tere sañg

ik āḳhirī raqs karūñ

aag aur dhueñ kī āmezish se

sidra-bos daraḳht banā.eñ

aur phir us ke saa.e tale

ham garjīle gītoñ kī lai par

chhātī se chhātī Takrā.eñ

qadam se qadam milā.eñ

kyā itrātā manzar hai

charchar karte maas kī boss meñ

āvāzoñ kā kyā nāyāb ḳhazāna hai

ye ik aisī simfanī hai

jis meñ ḳhauf nahīñ hai

dard uruuj par aa jaa.e to

ḳhauf kahāñ rahtā hai

aah karāh kā aisā sañgam

lafzoñ meñ kis ne bāñdhā hai

jism-o-sadā ke aise aise dā.ere

ban jaate haiñ jin meñ

azalī nir tak abad muġhannī ḳhud bhī kho jaate haiñ

aa ham chāroñ samt meñ

aag lagā deñ

dariyā aur samundar bhak se uḌā deñ

ḳhud ko bhasm kareñ

ai rī duniyā

terī karāhat se mujh ko

kuchh ishq hī aisā hai

maiñ martā huuñ

tū bhī mar jā

aa ri mail kuchaili

bhuki nangi duniya

main ne ek din teri qimat

ek kam besh rupae rakkhi thi

apne kahe par aaj bahut sharminda hun

aa main tere sang

ek aaKHiri raqs karun

aag aur dhuen ki aamezish se

sidra-bos daraKHt banaen

aur phir us ke sae tale

hum garjile giton ki lai par

chhati se chhati Takraen

qadam se qadam milaen

kya itraata manzar hai

charchar karte mas ki boss mein

aawazon ka kya nayab KHazana hai

ye ek aisi simfani hai

jis mein KHauf nahin hai

dard uruj par aa jae to

KHauf kahan rahta hai

aah karah ka aisa sangam

lafzon mein kis ne bandha hai

jism-o-sada ke aise aise daere

ban jate hain jin mein

azali nir tak abad mughanni KHud bhi kho jate hain

aa hum chaaron samt mein

aag laga den

dariya aur samundar bhak se uDa den

KHud ko bhasm karen

ai ri duniya

teri karahat se mujh ko

kuchh ishq hi aisa hai

main marta hun

tu bhi mar ja