darwaze ke bahar

vaqt hai bāhar khaḌā

ye kise mālūm hai darvāza kholeñ

kyā hamārā muntazir ho

kaun-sā dukh kaun-sī rāhat

nisāboñ meñ likhī sachchā.ī

yā āñkhoñ se girtā ashk

tārīkī khaḌī ho

yā kisī Tahnī kā tanhā phuul

āñkheñ sard gahrī

jin meñ kuchh khultā na ho ki kyā hai poshīda

numāyāñ kyā hai

kis kā aks hai

kaisī shabīh hai

ye samundar hai sarāb

phuul hai ki dhuul hai

ma.adūmiyat yā zindagī

kuchh bhī na khultā ho

faqat āñkheñ hoñ gahrī muntazir aur ik ḳhalā

aahaT kisī qadmoñ kī

aur koī nahīñ ho rāh-rau

yā phir lahū ho

aañkh se bahtā lahū

bachchoñ kā

dil kā

sā.ebānoñ kā lahū

zaḳhmī ridāoñ

naujavānoñ

raat din kā

yā kisī kī ehtajājī chīḳh kā

chup kā

kisī ke ḳhvāb kā

yā phuul kā

muskurāhaT ho kisī lab ko tarastī

yā ki phir taaza havā ho

yā sunahrī dhuup

mahbūba ho

koī dost

yā phir maut

ham meñ kise mālūm hai darvāza kholeñ

kyā hamārā muntazir ho

waqt hai bahar khaDa

ye kise malum hai darwaza kholen

kya hamara muntazir ho

kaun-sa dukh kaun-si rahat

nisabon mein likhi sachchai

ya aankhon se girta ashk

tariki khaDi ho

ya kisi Tahni ka tanha phul

aankhen sard gahri

jin mein kuchh khulta na ho ki kya hai poshida

numayan kya hai

kis ka aks hai

kaisi shabih hai

ye samundar hai sarab

phul hai ki dhul hai

madumiyat ya zindagi

kuchh bhi na khulta ho

faqat aankhen hon gahri muntazir aur ek KHala

aahaT kisi qadmon ki

aur koi nahin ho rah-rau

ya phir lahu ho

aankh se bahta lahu

bachchon ka

dil ka

saebanon ka lahu

zaKHmi ridaon

naujawanon

raat din ka

ya kisi ki ehtajaji chiKH ka

chup ka

kisi ke KHwab ka

ya phul ka

muskurahaT ho kisi lab ko tarasti

ya ki phir taza hawa ho

ya sunahri dhup

mahbuba ho

koi dost

ya phir maut

hum mein kise malum hai darwaza kholen

kya hamara muntazir ho