dastaras

hamārī dastaras meñ kyā hai kyā nahīñ

zamīñ nahīñ

ḳhalā nahīñ

ki āsmāñ nahīñ

hameñ to sirf sochnā ye chāhiye

ki muTThiyāñ khulī raheñ

hatheliyoñ se uñgliyāñ juḌī raheñ

zamīñ se paañv

paañv se qadam

qadam se rāstoñ kā silsila banā rahe

hameñ to sirf dekhnā ye chāhiye

ki jis ko log radd kareñ

aur apnī diid kī ġhalīz chādaroñ se Dhāñp kar shikāyatoñ se bāñdh deñ

hamāre jism māvarā hoñ us ġhilāf se

hamārī dastaras meñ kyā hai kyā nahīñ

bas yahī to shart hai

hamāre jism an-ginat raheñ

magar hamāre sar juḌe raheñ

ragoñ meñ pyaar kā lahū ravāñ rahe badan badan javāñ rahe

zamīñ rahe ḳhalā rahe na āsmāñ rahe

magar hameñ yahī gumāñ rahe

hamārī dastaras meñ kyā nahīñ

hamari dastaras mein kya hai kya nahin

zamin nahin

KHala nahin

ki aasman nahin

hamein to sirf sochna ye chahiye

ki muTThiyan khuli rahen

hatheliyon se ungliyan juDi rahen

zamin se panw

panw se qadam

qadam se raston ka silsila bana rahe

hamein to sirf dekhna ye chahiye

ki jis ko log radd karen

aur apni did ki ghaliz chadaron se Dhanp kar shikayaton se bandh den

hamare jism mawara hon us ghilaf se

hamari dastaras mein kya hai kya nahin

bas yahi to shart hai

hamare jism an-ginat rahen

magar hamare sar juDe rahen

ragon mein pyar ka lahu rawan rahe badan badan jawan rahe

zamin rahe KHala rahe na aasman rahe

magar hamein yahi guman rahe

hamari dastaras mein kya nahin